حضرت ابوبکر بن عیاش قرآن مجید کی آیت { فَسَوْفَ یَأْتِی اللَّہُ بِقَوْمٍ یُحِبُّہُمْ وَیُحِبُّونَہُ } کی تفسیر میں فرماتے ہیں کہ اس سے مراد قادسیہ والے ہیں۔ [مصنف ابن ابي شيبه/كتاب البعوث والسرايا/حدیث: 36023]

حضرت ابوبکر بن عمرو بن عتبہ فرماتے ہیں کہ حضرت عمر نے حضرت سعد اور کوفہ کے دوسرے امراء کو خط لکھا کہ میرے پاس عذیب اور حلوان کے درمیان کا علاقہ آیا ہے۔ یہ تمہارے لئے کافی ہے اگر تم تقویٰ اختیار کرو اور درستی سے چلو۔ اور اپنے اور اپنے دشمنوں کے درمیان خلا رکھو۔ [مصنف ابن ابي شيبه/كتاب البعوث والسرايا/حدیث: 36024]

حضرت عون بن عبد اللہ فرماتے ہیں کہ جنگ قادسیہ میں ایک مسلمان مجاہد کاپیٹ پھٹ گیا تھا اور اس کی انتڑیاں باہرنکل آئی تھیں۔ اس نے اپنے پاس سے گزرنے والے ایک شخص سے کہا کہ میری انتڑیوں کو میری طرف سمیٹ دو تاکہ میں اللہ کے راستے میں ایک یا دو نیزوں کے برابر آگے بڑھ سکوں۔ پھر اس کے پاس سے گزر ہوا تو وہ ایسا کرچکا تھا۔ [مصنف ابن ابي شيبه/كتاب البعوث والسرايا/حدیث: 36025]

حضرت ابو اسحاق فرماتے ہیں کہ میں نے عبید کے ساتھیوں کو دیکھا کہ وہ قادسیہ کی نبیذ پی رہے تھے اور ان میں عمرو بن میمون بھی تھے۔ [مصنف ابن ابي شيبه/كتاب البعوث والسرايا/حدیث: 36026]

حضرت مطرف نقل کرتے ہیں کہ حضرت طلحہ بن عبید اللہ نے نشاستج میں زمین کا ایک ٹکڑا خریدا، یہ بنو طلحہ کا نشاستج ہے جو سیلحین کے پاس ہے۔ پھر وہ حضرت عمر کے پاس آئے اور ان سے اس کا تذکرہ کیا اور فرمایا کہ میں نے ایک عمدہ اور خوبصورت زمین خریدی ہے۔ حضرت عمر نے پوچھا کہ تم نے کس سے خریدی ہے؟ کوفہ والوں سے؟ حضرت طلحہ نے کہا کہ میں نے قادسیہ والوں سے خریدی ہے۔ حضرت طلحہ نے کہا کہ میں تمام قادسیہ والوں سے کیسے خرید سکتا ہوں؟ حضرت عمر نے فرمایا کہ تم نے کچھ نہیں کیا یہ تو فیء ہے۔ [مصنف ابن ابي شيبه/كتاب البعوث والسرايا/حدیث: 36027]

حضرت لیث فرماتے ہیں کہ قادسیہ کے مجاہدین نے عجمیوں کو ذلیل کیا یہاں تک کہ انہوں نے تین دن تک لڑائی کی۔ [مصنف ابن ابي شيبه/كتاب البعوث والسرايا/حدیث: 36028]

حضرت ربیع بن عمیلہ فرماتے ہیں کہ کوفہ اور شام کے دو آدمیوں کا باہم مناظرہ ہوا، کوفی نے کہا کہ ہم قادسیہ کی جنگ میں شریک ہونے والے ہیں اور فلاں فلاں لڑائی لڑنے والے ہیں۔ شامی نے کہا کہ ہم نے یرموک کی لڑائی لڑی ہے اور فلاں فلاں لڑائی میں شریک ہوئے ہیں۔ حضرت حذیفہ رضی اللہ عنہ نے فرمایا کہ اللہ تعالیٰ نے تم دونوں میں سے کسی کو قوم عاد اور قوم ثمود کی ہلاکت پر حاضر نہیں کیا، اور جب اللہ تعالیٰ نے انہیں ہلاک کیا تو ان کے بارے میں تم میں سے کسی سے مشورہ نہیں کیا۔ اور کوئی بستی اس سے زیادہ اس لائق نہیں کہ اس سے کوئی بڑی مصیبت دور کی جائے، یعنی کوفہ۔ [مصنف ابن ابي شيبه/كتاب البعوث والسرايا/حدیث: 36029]

حضرت ریاح فرماتے ہیں کہ مسلمان مجاہدین کو مدائن میں ایک قبر ملی، جس میں ایک آدمی تھا جس کے بدن پر سونے کی تاروں والے کپڑے اور بہت سا مال تھا۔ مجاہدین اسے حضرت عمار بن یاسر کے پاس لائے۔ حضرت عمار نے اس بارے میں حضرت عمر بن خطاب کو خط لکھا۔ حضرت عمر نے انہیں حکم دیا کہ یہ سارا مال مجاہدین کو دے دو اور اسے ان سے واپس نہ لو۔ [مصنف ابن ابي شيبه/كتاب البعوث والسرايا/حدیث: 36030]

حضرت محمد بن عبید اللہ فرماتے ہیں کہ حضرت عمر نے سائب بن اقرع کو مدائن کا حاکم بنایا۔ ایک دن وہ اپنی مجلس میں بیٹھے تھے کہ ان کے پاس تانبے کا ایک مجسمہ لایا گیا جو ایسے آدمی کی شکل کا تھا جو اپنے ہاتھوں سے یوں اشارہ کر رہا ہو، اور راوی نے اپنے ہاتھ پھیلائے اور بعض انگلیاں بند کیں۔ سائب بن اقرع نے کہا کہ یہ میرا ہے، یہ اس مال میں سے ہے جو اللہ نے مجھے عطا کیا ہے۔ پھر انہوں نے اس بارے میں حضرت عمر کو خط لکھا تو حضرت عمر نے فرمایا کہ تم تو محض مسلمانوں کے ایک گورنر ہو، یہ سب کچھ مسلمانوں کے بیت المال میں جمع کرادو۔ [مصنف ابن ابي شيبه/كتاب البعوث والسرايا/حدیث: 36031]

حضرت نعمان بن حمید فرماتے ہیں کہ حضرت عمار کو کچھ مال غنیمت ملا اور اس کا کچھ حصہ آپ نے تقسیم کردیا۔ پھر انہوں نے حضرت عمر سے معذرت کرنے اور مشورہ لینے کے لئے حضرت عمر کو خط لکھا۔ انہوں نے فرمایا کہ سوار کے آنے تک لوگ آپس میں خرید و فروخت کرتے رہیں۔ [مصنف ابن ابي شيبه/كتاب البعوث والسرايا/حدیث: 36032]