حضرت ابوبکر بن ابی زہیر ثقفی اپنے والد سے روایت کرتے ہیں کہ انہوں نے نبی کریم صلی اللہ علیہ وآلہ وسلم کو مقام نَبَاۃَ یا مقام نَبَاوَۃ میں … نباوہ طائف کا حصہ ہے۔ خطبہ ارشاد فرماتے ہوئے سنا کہ آپ صلی اللہ علیہ وآلہ وسلم اپنے خطبہ میں فرما رہے تھے۔ ”قریب ہے کہ تم اہل جنت کو اہل جہنم سے (جدا) پہچان لو۔ اور اپنے بہتر لوگوں کو بدتر لوگوں سے (جدا) پہچان لو۔“ لوگوں نے عرض کیا۔ یا رسول اللہ صلی اللہ علیہ وآلہ وسلم! کس ذریعہ سے؟ آپ صلی اللہ علیہ وآلہ وسلم نے فرمایا۔ ”اچھی تعریف کے ذریعہ سے اور بُری تعریف کے ذریعہ سے، تم لوگ زمین میں خدا کے گواہ ہو۔“ [مصنف ابن ابي شيبه/كتاب المغازي/حدیث: 39733]

حضرت عبد الملک بیان کرتے ہیں کہ نبی کریم صلی اللہ علیہ وآلہ وسلم نے جب بنو ثقیف کا محاصرہ کیا ہوا تھا تب آپ صلی اللہ علیہ وآلہ وسلم نے فرمایا: جب سے میں نے اس جگہ پڑاؤ کیا ہے تب سے میں نے فرشتہ نہیں دیکھا۔ راوی کہتے ہیں: (یہ بات سن کر) حضرت خولہ بنت حکیم سلیمہ چل پڑیں اور انہوں نے یہ بات حضرت عمر کو بیان فرمائی۔ حضرت عمر نبی کریم صلی اللہ علیہ وآلہ وسلم کی خدمت میں حاضر ہوئے اور آپ صلی اللہ علیہ وآلہ وسلم سے خولہ کی بات بیان کی تو آپ صلی اللہ علیہ وآلہ وسلم نے ارشاد فرمایا: خولہ سچ کہتی ہیں۔ پھر حضرت عمر نے آپ صلی اللہ علیہ وآلہ وسلم کو کوچ کرنے کا اشارہ کیا چناچہ آپ صلی اللہ علیہ وآلہ وسلم نے کوچ فرما لیا۔ [مصنف ابن ابي شيبه/كتاب المغازي/حدیث: 39734]

حضرت عمرو بن شعیب سے روایت ہے کہ جب رسول اللہ صلی اللہ علیہ وآلہ وسلم طائف کے بعد حنین سے واپس ہوئے تو آپ صلی اللہ علیہ وآلہ وسلم نے ارشاد فرمایا:”سوئی، دھاگہ (تک) جمع کروا دو۔ کیونکہ غنیمت میں خیانت جہنم ہے اور خیانت کرنے والے کے لئے قیامت کے دن عیب و رسوائی ہے۔“ پھر آپ صلی اللہ علیہ وآلہ وسلم نے اونٹ کا ایک بال پکڑا اور فرمایا ”میرے لئے تمہارے اس مال میں سے یہ بھی نہیں ہے سوائے خمس کے اور خمس بھی (انجام کے اعتبار سے) تمہاری طرف رد ہوجاتا ہے۔ [مصنف ابن ابي شيبه/كتاب المغازي/حدیث: 39735]

حضرت ابن عباس رضی اللہ عنہما سے روایت ہے کہ جب رسول اللہ صلی اللہ علیہ وآلہ وسلم طائف سے تشریف لائے تو مقام جعرانہ میں فروکش ہوئے اور وہیں پر آپ صلی اللہ علیہ وآلہ وسلم نے غنیمتوں کو تقسیم فرمایا۔ پھر آپ صلی اللہ علیہ وآلہ وسلم نے اسی مقام پر عمرہ ادا فرمایا۔ اور یہ واقعہ شوال کی آخری دو راتوں سے قبل کا ہے۔ [مصنف ابن ابي شيبه/كتاب المغازي/حدیث: 39736]

حضرت زبیر سے روایت ہے کہ وہ طائف کے دن اپنی کچھ خالاؤں کے مالک ہوئے (لیکن) پھر وہ خالائیں ان کی ملکیت میں آنے کی وجہ سے ان پر آزاد ہوگئیں۔ [مصنف ابن ابي شيبه/كتاب المغازي/حدیث: 39737]

حضرت ابن عباس رضی اللہ عنہما روایت بیان کرتے ہیں کہ رسول اللہ صلی اللہ علیہ وآلہ وسلم نے مؤتہ کے طرف لشکر روانہ فرمایا اور ان پر حضرت زید کو حاکم مقرر فرمایا اور اگر یہ قتل ہوجائیں تو پھر حضرت جعفر امیر ہوں گے اور اگر یہ بھی قتل ہوجائیں تو پھر ابن رواحہ امیر ہوں گے۔ حضرت ابن رواحہ لشکر سے پیچھے رہ گئے اور انہوں نے جناب نبی کریم صلی اللہ علیہ وآلہ وسلم کے ہمراہ جمعہ کی نماز ادا فرمائی چناچہ آپ صلی اللہ علیہ وآلہ وسلم نے ان کو دیکھا اور پوچھا۔ تمہیں کس چیز نے (لشکر سے) پیچھے کردیا؟ انہوں نے جواب دیا۔ (اس لئے رُکا) تاکہ آپ صلی اللہ علیہ وآلہ وسلم کے ہمراہ جمعہ کی نماز ادا کرلوں۔ آپ صلی اللہ علیہ وآلہ وسلم نے ارشاد فرمایا: ”اللہ کے راستہ میں ایک صبح یا ایک شام دنیا ومافیہا سے بہتر ہے۔“ [مصنف ابن ابي شيبه/كتاب المغازي/حدیث: 39738]

حضرت خالد بن سمیر روایت کرتے ہیں کہ ہمارے پاس حضرت عبد اللہ بن رباح انصاری تشریف لائے (اور انصار صحابہ ان کو فقیہ سمجھتے تھے) تو انہوں نے فرمایا: ہمیں رسول اللہ صلی اللہ علیہ وآلہ وسلم کے گھڑ سوار ابو قتادہ نے بیان کیا۔ کہ رسول اللہ صلی اللہ علیہ وآلہ وسلم نے جیش الامراء (غزوہ مؤتہ کا لشکر) کو روانہ فرمایا تو ارشاد فرمایا: ”تم پر زید بن حارثہ حاکم ہیں۔ پس اگر یہ قتل ہوجائیں تو پھر جعفر بن ابی طالب ہیں اور اگر یہ بھی قتل ہوجائیں تو پھر عبد اللہ بن رواحہ ہیں۔“ حضرت جعفر اچھل پڑے اور عرض کیا۔ یا رسول اللہ صلی اللہ علیہ وآلہ وسلم! مجھے اس بات کا اندیشہ نہیں تھا کہ آپ مجھ پر زید کو حاکم بنائیں گے۔ آپ صلی اللہ علیہ وآلہ وسلم نے فرمایا: جانے دو! تم نہیں جانتے کہ ان میں کیا چیز خیر ہے۔ ٢۔ پھر یہ لوگ چل پڑے اور جتنی دیر اللہ کو منظور تھا یہ لوگ وہاں رہے۔ پھر (ایک دن) رسول اللہ صلی اللہ علیہ وآلہ وسلم منبر پر تشریف فرما ہوئے اور حکم دیا اور یہ منادی کی گئی کہ الصلاۃ جامعۃ۔ چناچہ لوگ رسول اللہ صلی اللہ علیہ وآلہ وسلم کی خدمت میں جمع ہوگئے تو آپ صلی اللہ علیہ وآلہ وسلم نے فرمایا: ”خیر کی بات پہنچی ہے، خیر کی بات پہنچی ہے۔ یہ بات تین مرتبہ ارشاد فرمائی۔ میں تمہیں اس لڑنے والے لشکر کے بارے میں خبر دیتا ہوں۔ یہ لوگ (یہاں سے) چلے تو ان کی دشمن سے ملاقات (اور لڑائی) ہوئی چناچہ حضرت زید شہادت کی حالت میں قتل کردیئے گئے۔ تم لوگ ان کے لئے استغفار کرو، پھر جھنڈا حضرت جعفر بن ابی طالب نے سنبھال لیا اور انہوں نے دشمن پر خوب حملہ کیا یہاں تک کہ وہ بھی شہادت کی حالت میں قتل ہوگئے۔ تم ان کی شہادت پر گواہ بن جاؤ اور ان کے لئے استغفار کرو۔ پھر جھنڈا، حضرت عبد اللہ بن رواحہ نے سنبھال لیا اور اپنے قدم خوب جما لئے (لیکن) آخر کار وہ شہید کردیئے گئے۔ تم ان کے لئے استغفار کرو پھر (ان کے بعد) جھنڈا حضرت خالد بن الولید نے سنبھال لیا ہے حالانکہ وہ (پہلے سے متعین) امیروں میں سے نہیں تھے (بلکہ) انہوں نے خود اپنے آپ کو امیر بنا لیا ہے۔“ پھر آپ صلی اللہ علیہ وآلہ وسلم نے دعا مانگی ”اے اللہ! یہ خالد تو تیری تلواروں میں سے ایک تلوار ہیں تو ہی ان کی مدد فرما۔“ اس دن سے حضرت خالد بن الولید کا نام سیف اللہ المسلول پڑگیا۔ اور رسول اللہ صلی اللہ علیہ وآلہ وسلم نے ارشاد فرمایا: ”نکل جاؤ اور اپنے بھائیوں کی مدد کرو۔ کوئی بھی تم میں سے پیچھے نہ رہے۔“ چناچہ صحابہ کرام پیدل اور سوار ہو کر نکل پڑے اور یہ سخت گرمی کا وقت تھا۔ ٣۔ ایک رات صحابہ راستہ سے ہٹے ہوئے تھے کہ رسول اللہ صلی اللہ علیہ وآلہ وسلم کو اونگھ آگئی یہاں تک کہ آپ صلی اللہ علیہ وآلہ وسلم کجاوہ سے ایک طرف جھک گئے۔ چناچہ میں آپ صلی اللہ علیہ وآلہ وسلم کے پاس پہنچا اور میں نے آپ صلی اللہ علیہ وآلہ وسلم کو اپنے ہاتھ سے سہارا دیا۔ پس جب آپ صلی اللہ علیہ وآلہ وسلم سیدھا کرنے والے آدمی کے ہاتھ کا چھونا محسوس فرمایا تو آپ صلی اللہ علیہ وآلہ وسلم نے پوچھا: یہ کون شخص ہے؟ میں نے عرض کیا: ابو قتادہ ہے۔ پھر آپ صلی اللہ علیہ وآلہ وسلم چل پڑے پھر (دوبارہ) آپ صلی اللہ علیہ وآلہ وسلم کو اونگھ آئی یہاں تک کہ آپ صلی اللہ علیہ وآلہ وسلم اپنے کجاوہ سے ایک طرف جھک گئے۔ میں (دوبارہ) آپ صلی اللہ علیہ وآلہ وسلم کے پاس حاضر ہوا اور میں نے اپنے ہاتھ سے آپ صلی اللہ علیہ وآلہ وسلم کو سہارا دیا۔ پھر جب آپ صلی اللہ علیہ وآلہ وسلم نے کسی سیدھا کرنے والے آدمی کے ہاتھ کا چھونا محسوس کیا تو آپ صلی اللہ علیہ وآلہ وسلم نے پوچھا۔ یہ کون شخص ہے؟ میں نے عرض کیا۔ ابو قتادہ ہے۔ راوی کہتے ہیں: آپ صلی اللہ علیہ وآلہ وسلم نے دوسری مرتبہ یا تیسری مرتبہ میں ارشاد فرمایا: میرا خیال تو اپنے بارے میں یہ ہے کہ میں نے تمہیں آج کی رات مشقت میں ڈال دیا ہے۔ راوی کہتے ہیں: میں نے عرض کیا۔ ہرگز نہیں! میرے ماں باپ آپ پر قربان ہوں۔ میں تو دیکھ رہا ہوں کہ نیند یا اونگھ نے آپ صلی اللہ علیہ وآلہ وسلم کو مشقت میں ڈالا ہوا ہے۔ لہٰذا اگر آپ ایک طرف ہوجائیں اور پڑاؤ ڈال لیں تاکہ آپ صلی اللہ علیہ وآلہ وسلم کی نیند ختم ہوجائے۔ آپ صلی اللہ علیہ وآلہ وسلم نے ارشاد فرمایا: مجھے اس بات کا خوف ہے کہ لوگ بے یار و مددگار رہ جائیں گے۔ راوی کہتے ہیں: میں نے عرض کیا: ہرگز نہیں! میرے ماں باپ آپ پر قربان ہوں۔ ٤۔ آپ صلی اللہ علیہ وآلہ وسلم نے فرمایا: ”پھر تم ہمارے واسطے پردے والی جگہ تلاش کرو۔“ راوی کہتے ہیں: میں راستہ سے اترا تو اچانک مجھے درختوں کا ایک جھُنڈ نظر آیا۔ چناچہ میں آپ صلی اللہ علیہ وآلہ وسلم کی خدمت میں حاضر ہوا اور میں نے عرض کیا۔ یا رسول اللہ صلی اللہ علیہ وآلہ وسلم! یہ درختوں کا جُھنڈ ہے جو مجھے ملا ہے۔ راوی کہتے ہیں: پھر رسول اللہ صلی اللہ علیہ وآلہ وسلم راستہ سے ہٹ گئے اور آپ صلی اللہ علیہ وآلہ وسلم کے ساتھ راستہ میں آپ کے قریب والے لوگ بھی ہٹ گئے۔ چناچہ انہوں نے پڑاؤ ڈالا اور درختوں کے اس جھُنڈ کے ذریعہ راستہ سے اوٹ میں ہوگئے۔ پھر ہماری آنکھ اسی وقت کھلی جب سورج ہم پر طلوع ہوچکا تھا۔ ہم گھبرائے ہوئے اٹھے تو رسول اللہ صلی اللہ علیہ وآلہ وسلم نے فرمایا: آرام سے، آرام سے۔ یہاں تک کہ سورج بلند ہوگیا۔ پھر آپ صلی اللہ علیہ وآلہ وسلم نے ارشاد فرمایا: جو شخص فجر کی نماز سے پہلے یہ دو رکعتیں پڑھا کرتا تھا وہ انہیں پڑھ لے۔ چناچہ جو انہیں پڑھا کرتا تھا اور جو نہیں پڑھا کرتا تھا سب نے انہیں پڑھ لیا۔ پھر آپ صلی اللہ علیہ وآلہ وسلم نے حکم دیا تو نماز کا اعلان کیا گیا۔ پھر رسول اللہ صلی اللہ علیہ وآلہ وسلم آگے بڑھے اور ہمیں نماز پڑھائی۔ جب آپ صلی اللہ علیہ وآلہ وسلم نے سلام پھیرا تو فرمایا: ہم اللہ کی حمد کرتے ہیں کہ ہم دنیا کے کسی ایسے کام میں نہیں تھے جو ہمیں ہماری نماز سے غافل کردیتا، بلکہ ہماری روحیں اللہ کے ہاتھ میں تھیں، اس نے جب چاہا انہیں چھوڑا۔ خبردار! جس نیک بندے کو یہ نماز پا لے وہ اس کے ساتھ اس جیسی ایک نماز قضا کرے۔ لوگوں نے عرض کیا۔ یا رسول اللہ صلی اللہ علیہ وآلہ وسلم! پیاس! آپ صلی اللہ علیہ وآلہ وسلم نے فرمایا: اے ابو قتادہ! کوئی پیاس نہیں۔ مجھے وضو کا برتن دکھاؤ۔ فرماتے ہیں: میں وہ لے کر آپ صلی اللہ علیہ وآلہ وسلم کے پاس آیا تو آپ صلی اللہ علیہ وآلہ وسلم نے اسے اپنی بغل میں رکھا پھر اس کا منہ اپنے منہ میں لیا۔ پس اللہ ہی بہتر جانتا ہے کہ آپ صلی اللہ علیہ وآلہ وسلم نے اس میں پھونک ماری یا نہیں۔ پھر آپ صلی اللہ علیہ وآلہ وسلم نے فرمایا: اے ابو قتادہ! مجھے سواری پر رکھا ہوا چھوٹا پیالہ دکھاؤ۔ چناچہ میں آپ صلی اللہ علیہ وآلہ وسلم کے پاس ایک درمیانے سائز کا پیالہ لے کر آیا تو آپ صلی اللہ علیہ وآلہ وسلم نے اس میں پانی انڈیلا اور فرمایا: لوگوں کو پلاؤ۔ اور رسول اللہ صلی اللہ علیہ وآلہ وسلم نے بلند آواز سے پکار کر فرمایا: خبردار! جس کے پاس اس کا برتن پہنچے وہ اسے پی لے۔ میں نے ایک آدمی کے پاس جا کر اسے پلایا۔ پھر میں پیالے کا بچا ہوا پانی لے کر رسول اللہ صلی اللہ علیہ وآلہ وسلم کے پاس واپس آیا۔ پھر میں گیا اور اس کے ساتھ والے کو پلایا یہاں تک کہ میں نے اس حلقہ والوں کو پلا دیا۔ پھر میں پیالے کا بچا ہوا پانی لے کر رسول اللہ صلی اللہ علیہ وآلہ وسلم کے پاس واپس آیا۔ پھر میں گیا اور ایک دوسرے حلقہ کو پلایا یہاں تک کہ میں نے سات جماعتوں کو پلا دیا۔ اور میں اونچا ہو کر دیکھنے لگا کہ کیا اس میں کچھ باقی ہے؟ پھر رسول اللہ صلی اللہ علیہ وآلہ وسلم نے پیالے میں پانی انڈیلا اور مجھ سے فرمایا: پیو۔ میں نے عرض کیا: میرے ماں باپ آپ پر قربان ہوں۔ مجھے زیادہ پیاس محسوس نہیں ہو رہی۔ آپ صلی اللہ علیہ وآلہ وسلم نے فرمایا: مجھ سے پرے ہو جاؤ، کیونکہ میں آج سے لوگوں کو پلانے والا ہوں۔ راوی کہتے ہیں: پھر رسول اللہ صلی اللہ علیہ وآلہ وسلم نے پیالے میں انڈیلا تو میں نے پیا، پھر پیالے میں انڈیلا تو میں نے پیا، پھر پیالے میں انڈیلا تو میں نے پیا۔ پھر آپ صلی اللہ علیہ وآلہ وسلم سوار ہوئے اور ہم بھی سوار ہوگئے۔ پھر آپ صلی اللہ علیہ وآلہ وسلم نے فرمایا: تمہارا کیا خیال ہے کہ جب لوگوں نے اپنے نبی کو نہ پایا اور ان کی نماز کا وقت ان پر آ پہنچا تو انہوں نے کیا کیا؟ ہم نے عرض کیا: اللہ اور اس کا رسول بہتر جانتے ہیں۔ آپ صلی اللہ علیہ وآلہ وسلم نے فرمایا: کیا ان میں ابوبکر اور عمر نہیں ہیں؟ اگر وہ ان دونوں کی اطاعت کریں گے تو وہ ہدایت پا جائیں گے اور ان کی ماں بھی ہدایت پا جائے گی، اور اگر وہ ان دونوں کی نافرمانی کریں گے تو وہ گمراہ ہو جائیں گے اور ان کی ماں بھی گمراہ ہو جائے گی۔ یہ بات تین مرتبہ ارشاد فرمائی۔ پھر آپ صلی اللہ علیہ وآلہ وسلم چلے اور ہم بھی چلے یہاں تک کہ جب دوپہر کی شدید گرمی کا وقت ہوا تو اچانک کچھ لوگ درختوں کے سایوں کے پیچھے چلتے نظر آئے۔ ہم ان کے پاس پہنچے تو وہ مہاجرین میں سے کچھ لوگ تھے جن میں حضرت عمر بن خطاب بھی تھے۔ فرماتے ہیں: ہم نے ان سے کہا: جب تم نے اپنے نبی کو نہ پایا اور تمہاری نماز کا وقت تم پر آ پہنچا تو تم نے کیا کیا؟ انہوں نے کہا: اللہ کی قسم! ہم تمہیں بتاتے ہیں۔ حضرت عمر اچھل پڑے اور حضرت ابوبکر سے کہا: اللہ نے اپنی کتاب میں فرمایا ہے: بے شک آپ بھی مرنے والے ہیں اور وہ بھی مرنے والے ہیں۔ [الزمر: 30] اور اللہ کی قسم! میں نہیں جانتا، شاید اللہ نے اپنے نبی کو وفات دے دی ہو۔ لہٰذا آپ اٹھیں، نماز پڑھیں اور چل پڑیں، میں آپ کے بعد دیکھوں گا اور انتظار کروں گا۔ اگر میں نے کچھ دیکھ لیا (تو ٹھہروں گا) ورنہ آپ سے آ ملوں گا۔ فرماتے ہیں: پھر نماز کھڑی ہوگئی اور حدیث منقطع ہوگئی۔ [مصنف ابن ابي شيبه/كتاب المغازي/حدیث: 39739]

حضرت عائشہ رضی اللہ عنہا بیان فرماتی ہیں کہ جب رسول اللہ صلی اللہ علیہ وآلہ وسلم کے پاس حضرت جعفر بن ابی طالب، زید بن حارثہ اور عبد اللہ بن رواحہ کی موت کی خبر پہنچی تو رسول اللہ صلی اللہ علیہ وآلہ وسلم تشریف فرما ہوگئے اور آپ صلی اللہ علیہ وآلہ وسلم کے چہرہ مبارک پر غم کے اثرات ظاہر تھے۔ حضرت عائشہ رضی اللہ عنہا کہتی ہیں۔ میں (آپ صلی اللہ علیہ وآلہ وسلم کو) دروازہ کی پھاڑ سے دیکھ رہی تھی کہ آپ صلی اللہ علیہ وآلہ وسلم کی خدمت میں ایک شخص حاضر ہوا اور اس نے عرض کیا۔ یا رسول اللہ صلی اللہ علیہ وآلہ وسلم! جعفر کی عورتیں … پھر اس آدمی نے ان عورتوں کے رونے کا ذکر کیا تو آپ صلی اللہ علیہ وآلہ وسلم نے اس آدمی سے کہا کہ وہ انہیں (جا کر) منع کرے۔ [مصنف ابن ابي شيبه/كتاب المغازي/حدیث: 39740]

حضرت شعبی بیان کرتے ہیں کہ حضرت جعفر بن ابی طالب غزوہ مؤتہ میں مقام بلقاء میں شہید ہوئے تو رسول اللہ صلی اللہ علیہ وآلہ وسلم نے دعا فرمائی: ”اے اللہ! جعفر کے گھر جعفر کا وہ بہترین خلیفہ پیدا فرما جو تو اپنے نیک بندوں میں سے کسی بندہ کو عطا کرتا ہے۔ [مصنف ابن ابي شيبه/كتاب المغازي/حدیث: 39741]

حضرت خالد بن ولید بیان کرتے ہیں کہ غزوہ مؤتہ کے دن میرے ہاتھ میں نو تلواریں ٹوٹ گئیں۔ پھر (آخر) میرے ہاتھ میں ایک چوڑی یمنی تلوار باقی رہی۔ [مصنف ابن ابي شيبه/كتاب المغازي/حدیث: 39742]