سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”ولی کے بغیر نکاح نہیں ہوتا۔“ ابوعامر نامی راوی کا نام صالح بن رستم ہے۔ [صحیح ابن حبان/كتاب النكاح/حدیث: 4076]

سیدنا ابوموسیٰ اشعری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”ولی کے بغیر نکاح نہیں ہوتا۔“ [صحیح ابن حبان/كتاب النكاح/حدیث: 4077]

سیدنا ابوموسیٰ اشعری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”ولی کے بغیر نکاح درست نہیں ہوتا۔“ [صحیح ابن حبان/كتاب النكاح/حدیث: 4078]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”کنواری لڑکی سے اس کی ذات کے بارے میں مرضی معلوم کی جائے گی، اگر وہ خاموش رہے تو یہ اس کی رضامندی شمار ہوگی اور اگر وہ انکار کر دے تو اس کے ساتھ زبردستی نہیں کی جا سکتی۔“ [صحیح ابن حبان/كتاب النكاح/حدیث: 4079]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم نے ارشاد فرمایا ہے: ”لڑکیوں کی شادی میں ان سے مرضی معلوم کر لیا کرو۔“ عرض کی گئی: کنواری لڑکی شرما جاتی ہے۔ نبی اکرم صلی اللہ علیہ وسلم نے فرمایا: ”اس کی خاموشی اس کا اقرار ہو گی۔“ [صحیح ابن حبان/كتاب النكاح/حدیث: 4080]

ابوعمرو ذکوان بیان کرتے ہیں کہ سیدہ عائشہ رضی اللہ عنہا نے کنواری لڑکی کے بارے میں دریافت کیا جسے نکاح کا پیغام آتا ہے، تو نبی اکرم صلی اللہ علیہ وسلم نے ارشاد فرمایا: ”خواتین کی شادی کے بارے میں ان سے مرضی معلوم کی جائے گی۔“ سیدہ عائشہ رضی اللہ عنہا نے عرض کی: یا رسول اللہ صلی اللہ علیہ وسلم ! کنواری لڑکی شرما جاتی ہے اور خاموش رہتی ہے (تو اس صورت میں کیا حکم ہو گا) نبی اکرم صلی اللہ علیہ وسلم نے فرمایا: ”اس کی خاموشی اس کا اقرار ہو گی۔“ [صحیح ابن حبان/كتاب النكاح/حدیث: 4081]

سیدہ عائشہ صدیقہ رضی اللہ عنہا کے بارے میں یہ بات منقول ہے انہوں نے نبی اکرم صلی اللہ علیہ وسلم کی خدمت میں عرض کی: کنواری لڑکی شرما جاتی ہے، تو نبی اکرم صلی اللہ علیہ وسلم نے فرمایا: ”اس کی رضامندی اس کی خاموشی ہو گی۔“ [صحیح ابن حبان/كتاب النكاح/حدیث: 4082]

سیدنا ابوموسیٰ اشعری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”ولی کے بغیر نکاح نہیں ہوتا۔“ (امام ابن حبان رحمہ اللہ فرماتے ہیں:) ابوبردہ نامی راوی نے سیدنا ابوموسیٰ اشعری رضی اللہ عنہ کے حوالے سے یہ روایت مرفوع حدیث کے طور پر سنی ہے، تو ایک مرتبہ انہوں نے یہ روایت اپنے والد کے حوالے سے مسند طور پر نقل کر دی اور ایک مرتبہ اسے مرسل روایت کے طور پر نقل کر دیا۔ ابواسحاق نے یہ روایت ابوبردہ کے حوالے سے مرسل اور مسند دونوں طرح سنی ہے، تو ایک مرتبہ وہ ان کے حوالے سے مرفوع حدیث کے طور پر نقل کر دیتے ہیں اور ایک مرتبہ اسے مرسل حدیث کے طور پر نقل کر دیتے ہیں، تو اس میں کوئی شبہ نہیں ہے کہ یہ روایت مرسل اور مسند دونوں اعتبار سے صحیح (یعنی مستند) ہے، اس کے مستند ہونے میں کوئی شک نہیں ہے۔ [صحیح ابن حبان/كتاب النكاح/حدیث: 4083]

سیدنا عبداللہ بن عباس رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”ثیبہ (یعنی بیوہ یا طلاق یافتہ) عورت اپنی ذات کے بارے میں اپنے ولی سے زیادہ حق رکھتی ہے اور کنواری لڑکی سے اس کی مرضی معلوم کی جائے گی، اس کی خاموشی اس کی اجازت ہو گی۔“ [صحیح ابن حبان/كتاب النكاح/حدیث: 4084]

ابوبردہ بن ابوموسیٰ اپنے والد (سیدنا ابوموسیٰ اشعری رضی اللہ عنہ) کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں: ”کنواری لڑکی سے اس کی ذات کے بارے میں مرضی معلوم کی جائے گی، اگر وہ خاموش رہے، تو اس نے اجازت دے دی، اگر وہ انکار کر دے تو اسے مجبور نہیں کیا جائے گا۔“ [صحیح ابن حبان/كتاب النكاح/حدیث: 4085]