عاصم، زر سے اور وہ سیدنا عبداللہ بن مسعود رضی اللہ عنہ سے سابقہ (ابتدا میں اسلام لانے والے سات افراد کی) حدیث کی طرح روایت کرتے ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5579]

عمیر بن اسحاق، سیدنا مقداد بن اسود رضی اللہ عنہ سے روایت کرتے ہیں، انہوں نے کہا: رسول اللہ صلی اللہ علیہ وسلم نے مجھے ایک مہم پر (امیر بنا کر) بھیجا، جب میں واپس آیا تو آپ صلی اللہ علیہ وسلم نے مجھ سے پوچھا: ”تم نے اپنے آپ کو کیسا پایا؟“ میں نے عرض کیا: ”(امارت کے نشے میں) میری یہ حالت ہو گئی تھی کہ میں اپنے ساتھیوں کو اپنا غلام اور خادم سمجھنے لگا تھا۔ اللہ کی قسم! اس کے بعد میں کبھی دو آدمیوں پر بھی امیر نہیں بنوں گا۔“
یہ حدیث صحیح الاسناد ہے لیکن شیخین نے اسے روایت نہیں کیا۔
سیدنا ابو عبس بن جبر انصاری خزرجی رضی اللہ عنہ کے مناقب کا بیان۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5580]

ابن اسحاق سے بنو حارث بن خزرج بن عمرو بن مالک بن اوس میں سے رسول اللہ صلی اللہ علیہ وسلم کے ہمراہ غزوہ بدر میں شرکت کرنے والوں کے ناموں کے بارے میں مروی ہے کہ ان میں ابو عبس بن جبر بن عمرو بن زید بن جشم بن حارثہ رضی اللہ عنہ بھی شامل تھے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5581]

عروہ سے روایت ہے، انہوں نے کہا: ابو عبس بن جبر بن عمرو بن زید بن جشم بن حارثہ رضی اللہ عنہ نے رسول اللہ صلی اللہ علیہ وسلم کے ہمراہ غزوہ بدر میں شرکت کی تھی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5582]

امام احمد بن حنبل کہتے ہیں کہ میں نے یعقوب کے سامنے غزوہ بدر میں شریک ہونے والوں کے نام پڑھے، جن میں ابو عبس بن جبر رضی اللہ عنہ کا نام بھی تھا، اور ان کا اصل نام عبدالرحمٰن بن جبر تھا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5583]

محمد بن عبداللہ بن نمیر بیان کرتے ہیں کہ ابو عبس عبداللہ بن جبر بن عمرو بن زید انصاری رضی اللہ عنہ اور کعب احبار کی وفات تینتیس (33) ہجری میں ہوئی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5584]

ابراہیم بن منذر بیان کرتے ہیں کہ ابو عبس عبدالرحمٰن بن جبر رضی اللہ عنہ کی وفات چونتیس (34) ہجری میں ہوئی، اور اس وقت ان کی عمر ستر سال تھی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5585]

محمد بن عمر بیان کرتے ہیں کہ ابو عبس بن جبر اور خنیس بن حذافہ سہمی (رضی اللہ عنہما کے درمیان رسول اللہ صلی اللہ علیہ وسلم نے مواخات کروائی تھی)، اور ابو عبس رضی اللہ عنہ نے غزوہ بدر، احد، خندق اور تمام غزوات میں رسول اللہ صلی اللہ علیہ وسلم کے ہمراہ شرکت کی تھی، اور ان لوگوں میں بھی شامل تھے جنہوں نے (گستاخِ رسول) کعب بن اشرف کو قتل کیا تھا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5586]

محمد بن عمر بیان کرتے ہیں کہ ابو عبس بن جبر کی اولاد میں سے عبدالحمید بن ابی عبس نے مجھے بتایا کہ ابو عبس رضی اللہ عنہ کی وفات چونتیس (34) ہجری میں ہوئی، اس وقت ان کی عمر ستر سال تھی۔ سیدنا عثمان رضی اللہ عنہ نے ان کی نمازِ جنازہ پڑھائی، اور ان کی قبر میں (انہیں اتارنے کے لیے) ابو بردہ بن نیار، قتادہ بن نعمان، محمد بن مسلمہ اور سلمہ بن سلامہ بن وقش رضی اللہ عنہم اترے تھے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5587]

میمون بن زید بن ابی عبس اپنے والد سے روایت کرتے ہیں کہ ابو عبس رضی اللہ عنہ رسول اللہ صلی اللہ علیہ وسلم کے ساتھ نمازیں پڑھتے تھے اور پھر (اپنے محلے) بنو حارثہ کی طرف لوٹ جاتے تھے۔ ایک اندھیری اور بارش والی رات کو وہ نکلے تو ان کی لاٹھی میں ان کے لیے روشنی کر دی گئی، یہاں تک کہ وہ بنو حارثہ کے محلے میں پہنچ گئے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 5588]