سیدنا عمران بن حصین رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”علی کی طرف دیکھنا عبادت ہے۔“
یہ حدیث صحیح الاسناد ہے اور سیدنا عبداللہ بن مسعود رضی اللہ عنہ سے مروی اس کے شواہد بھی صحیح ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4732]

سیدنا عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”علی کے چہرے کی طرف دیکھنا عبادت ہے۔“ اس روایت کی متابعت عمرو بن مرہ نے ابراہیم نخعی کے واسطے سے بھی کی ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4733]

سیدنا عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”علی کے چہرے کی طرف دیکھنا عبادت ہے۔“ [المستدرك على الصحيحين/كتاب معرفة الصحابة رضي الله تعالى عنهم/حدیث: 4734]

سیدنا علی بن حسین سے روایت ہے کہ سیدنا عمر بن خطاب رضی اللہ عنہ نے سیدنا علی رضی اللہ عنہ سے ان کی صاحبزادی ام کلثوم کا رشتہ مانگا اور کہا: ”ان کا نکاح میرے ساتھ کر دیں،“ سیدنا علی رضی اللہ عنہ نے فرمایا: ”میں نے انہیں اپنے بھتیجے عبداللہ بن جعفر کے لیے روک رکھا ہے،“ سیدنا عمر رضی اللہ عنہ نے اصرار کرتے ہوئے کہا: ”ان کا نکاح مجھ سے کر دیں، کیونکہ اللہ کی قسم! لوگوں میں کوئی بھی ایسا نہیں ہے جو اس رشتے میں وہ فضیلت پانے کا آرزومند ہو جس کا میں طلبگار ہوں،“ چنانچہ سیدنا علی رضی اللہ عنہ نے ان کا نکاح سیدنا عمر رضی اللہ عنہ سے کر دیا۔ پھر سیدنا عمر رضی اللہ عنہ مہاجرین کے پاس آئے اور فرمایا: ”کیا تم مجھے مبارکباد نہیں دو گے؟“ انہوں نے پوچھا: اے امیر المؤمنین! کس خوشی میں؟ انہوں نے فرمایا: ”سیدنا علی رضی اللہ عنہ کی صاحبزادی اور رسول اللہ صلی اللہ علیہ وسلم کی نواسی ام کلثوم رضی اللہ عنہا کے ساتھ میرے نکاح کی خوشی میں، کیونکہ میں نے رسول اللہ صلی اللہ علیہ وسلم کو فرماتے سنا ہے: ”قیامت کے دن ہر نسب اور سسرالی تعلق (سبب) منقطع ہو جائے گا سوائے میرے نسب اور تعلق کے،“ اس لیے میں نے یہ پسند کیا کہ میرے اور رسول اللہ صلی اللہ علیہ وسلم کے درمیان نسبی اور سسرالی رشتہ قائم ہو جائے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4735]

سیدنا علی بن ابی طالب رضی اللہ عنہ سے روایت ہے کہ رسول اللہ صلی اللہ علیہ وسلم نے مجھ سے فرمایا: ”یہ ایک پکا عہد ہے کہ عنقریب یہ امت میرے بعد تمہارے ساتھ بے وفائی کرے گی، تم میرے دین پر زندگی گزارو گے اور میری سنت پر شہید کیے جاؤ گے، جس نے تم سے محبت کی اس نے مجھ سے محبت کی اور جس نے تم سے بغض رکھا اس نے مجھ سے بغض رکھا، اور یقیناً یہ (داڑھی) اس (سر کے خون) سے رنگین ہو جائے گی۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4736]

سیدنا حذیفہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اگر تم ابوبکر کو حکمران بناؤ گے تو وہ دنیا سے بے رغبت اور آخرت کے طلبگار ہیں، البتہ ان کے جسم میں کچھ نحافت ہے، اور اگر تم عمر کو حکمران بناؤ گے تو وہ قوی اور امانت دار ہیں، اللہ کے معاملے میں کسی ملامت کرنے والے کی ملامت کی پروا نہیں کرتے، اور اگر تم علی کو حکمران بناؤ گے تو وہ خود بھی ہدایت یافتہ ہیں اور دوسروں کو بھی راہ دکھانے والے ہیں، وہ تمہیں صراطِ مستقیم پر ثابت قدم رکھیں گے۔“
یہ حدیث صحیح الاسناد ہے لیکن شیخین نے اسے روایت نہیں کیا۔
[امیر المؤمنین علی بن ابی طالب رضی اللہ عنہ کی شہادت کا مختصر تذکرہ، مستند ترین اسانید کے ساتھ] [المستدرك على الصحيحين/كتاب معرفة الصحابة رضي الله تعالى عنهم/حدیث: 4737]

حیان اسدی سے مروی ہے کہ میں نے سیدنا علی رضی اللہ عنہ کو یہ کہتے ہوئے سنا کہ رسول اللہ صلی اللہ علیہ وسلم نے مجھ سے فرمایا: ”بے شک امت میرے بعد تمہارے ساتھ بے وفائی کرے گی، جبکہ تم میرے دین پر زندگی گزارو گے اور میری سنت پر شہید کیے جاؤ گے، جس نے تم سے محبت کی اس نے مجھ سے محبت کی اور جس نے تم سے بغض رکھا اس نے مجھ سے بغض رکھا، اور یقیناً یہ (داڑھی) اس (سر کے خون) سے رنگین ہو جائے گی۔“
یہ حدیث صحیح ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4737N]

زید بن وہب سے روایت ہے کہ سیدنا علی رضی اللہ عنہ کے پاس اہل بصرہ کا ایک وفد آیا جس میں جعد بن بعجہ نامی ایک خارجی بھی تھا، اس نے اللہ کی حمد و ثنا اور نبی کریم صلی اللہ علیہ وسلم پر درود کے بعد کہا: اے علی! اللہ سے ڈرو کیونکہ تم نے مرنا ہے، تو سیدنا علی رضی اللہ عنہ نے اس سے فرمایا: ”نہیں، بلکہ میں اس (سر) پر ایسی ضرب سے قتل کیا جاؤں گا جس سے یہ (داڑھی) رنگین ہو جائے گی، یہ ایسا فیصلہ ہے جو ہو چکا ہے اور ایسا عہد ہے جو کیا جا چکا ہے، اور وہ شخص نامراد ہوا جس نے بہتان باندھا۔“ پھر اس نے سیدنا علی رضی اللہ عنہ کے لباس پر عیب لگایا اور کہا: ”کاش آپ اس سے بہتر لباس پہنتے!“ تو آپ نے فرمایا: ”میرا یہ لباس مجھے تکبر سے دور رکھنے والا اور مسلمانوں کے لیے میری پیروی کرنے کے لیے زیادہ موزوں ہے۔“ [المستدرك على الصحيحين/كتاب معرفة الصحابة رضي الله تعالى عنهم/حدیث: 4738]

حریث بن مخشی سے مروی ہے کہ سیدنا علی رضی اللہ عنہ 21 رمضان المبارک کی صبح شہید ہوئے، راوی کہتے ہیں کہ میں نے سیدنا حسن بن علی رضی اللہ عنہما کو خطبہ دیتے ہوئے سنا جس میں انہوں نے سیدنا علی رضی اللہ عنہ کے مناقب بیان کیے اور فرمایا: ”وہ اسی رات شہید ہوئے جس میں قرآن نازل ہوا، جس میں عیسیٰ علیہ السلام آسمان پر اٹھائے گئے اور جس میں موسیٰ علیہ السلام کی روح قبض کی گئی تھی۔“ راوی کہتے ہیں کہ سیدنا حسن بن علی رضی اللہ عنہما نے ان کی نمازِ جنازہ پڑھائی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4739]

سیدنا علی رضی اللہ عنہ کے ایک آزاد کردہ غلام سے روایت ہے کہ سیدنا حسن رضی اللہ عنہ نے سیدنا علی رضی اللہ عنہ کی نمازِ جنازہ پڑھائی اور اس میں چار تکبیریں کہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4740]