سیدنا حبیب ابن ابی حبیب رضی اللہ عنہ فرماتے ہیں: میں رسول اللہ صلی اللہ علیہ وسلم کی بارگاہ میں حاضر تھا۔ آپ نے سیدنا حسان بن ثابت رضی اللہ عنہ نے فرمایا: کیا تم نے ابوبکر رضی اللہ عنہ کی شان میں بھی کچھ کہا ہے؟ سیدنا حسان رضی اللہ عنہ نے عرض کی: جی ہاں۔ آپ علیہ السلام نے فرمایا: مجھے سناؤ۔ تو (سیدنا حسان رضی اللہ عنہ) کہتے ہیں: میں نے کہا: وہ بلند پہاڑ کے غار میں دو میں سے دوسرے تھے اور جب وہ پہاڑ پر چڑھ رہے تھے تو دشمن بھی ان کا ہم پلہ نہ تھا۔ وہ رسول اللہ صلی اللہ علیہ وسلم کے محبوب تھے اور یہ بات سب جانتے ہیں کہ مخلوقات میں سے کوئی بھی ان کا ہم پلہ نہ تھا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4511]

سیدنا مرہ الطیب کہتے ہیں: ابوسفیان بن حرب، سیدنا علی ابن ابی طالب کے پاس آیا اور بولا: یہ کیا بات ہوئی کہ قریش کے غریب ترین اور کمزور ترین آدمی کو خلافت سپرد کر دی گئی۔ خدا کی قسم! اگر آپ چاہیں تو میں گھوڑوں اور لوگوں سے (سارا میدان) بھر دوں۔ سیدنا علی رضی اللہ عنہ نے فرمایا: اے ابوسفیان! تم نے اسلام کے ساتھ جو طویل دشمنی رکھی وہ اسلام کو کوئی نقصان نہیں پہنچا سکی۔ ہم تو صرف ابوبکر رضی اللہ عنہ کو ہی خلافت کا اہل سمجھتے ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4512]

سیدنا جابر بن عبداللہ رضی اللہ عنہ فرماتے ہیں: ہم نبی اکرم صلی اللہ علیہ وسلم کی خدمت میں حاضر تھے کہ عبدالقیس کا وفد آیا اور ان میں سے بعض نے بہت لغو گفتگو کی۔ رسول اللہ صلی اللہ علیہ وسلم نے سیدنا ابوبکر رضی اللہ عنہ کی جانب متوجہ ہو کر فرمایا: ان کی باتیں سنی ہیں؟ انہوں نے عرض کی: جی ہاں یا رسول اللہ صلی اللہ علیہ وسلم ۔ اور میں سمجھ بھی چکا ہوں۔ آپ صلی اللہ علیہ وسلم نے فرمایا: ان کو جواب دو۔ (سیدنا جابر رضی اللہ عنہ) فرماتے ہیں: سیدنا ابوبکر رضی اللہ عنہ نے ان کو بہت عمدہ جواب دیا۔ رسول اللہ صلی اللہ علیہ وسلم نے فرمایا: اے ابوبکر رضی اللہ عنہ! اللہ تعالیٰ تمہیں ” رضوان اکبر “ عطا فرمائے۔ صحابہ کرام رضی اللہ عنہم نے پوچھا: یا رسول اللہ صلی اللہ علیہ وسلم ! ” رضوان اکبر “ کیا چیز ہے؟ آپ صلی اللہ علیہ وسلم نے فرمایا: اللہ تعالیٰ آخرت میں اپنے بندوں پر عام تجلی فرمائے گا جب کہ ابوبکر رضی اللہ عنہ پر خاص تجلی فرمائے گا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4513]

ام المومنین سیدہ عائشہ رضی اللہ عنہا فرماتی ہیں: اگر رسول اللہ صلی اللہ علیہ وسلم کسی کو خلیفہ نامزد کرتے تو سیدنا ابوبکر رضی اللہ عنہ اور سیدنا عمر رضی اللہ عنہ کو کرتے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4514]

سیدنا عبداللہ رضی اللہ عنہ فرماتے ہیں: جس چیز کومسلمان اچھا جانیں وہ اللہ تعالیٰ کے ہاں اچھی ہی ہے اور جس چیز کو مسلمان برا جانیں وہ اللہ تعالیٰ کے ہاں بھی بری ہے۔ اور تحقیق تمام صحابہ کرام رضی اللہ عنہ کی رائے یہ ہے کہ سیدنا ابوبکر رضی اللہ عنہ کو خلیفہ بنایاجائے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4515]

سیدنا عبداللہ بن مسعود رضی اللہ عنہ فرماتے ہیں: جب نبی اکرم صلی اللہ علیہ وسلم کا انتقال ہوا تو تمام مہاجرین اور انصار سیدنا ابوبکر رضی اللہ عنہ کی بیعت کرنے کے لئے بنو ساعد کی حویلی میں جمع ہو گئے۔ میں سیدہ ام سلمہ رضی اللہ عنہا کے پاس آیا اور ان کو بتایا کہ لوگوں نے سیدنا ابوبکر رضی اللہ عنہ کی بیعت کر لی ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4516]

سیدنا ابووائل رضی اللہ عنہ فرماتے ہیں: سیدنا علی ابن ابی طالب رضی اللہ عنہ سے کہا گیا: آپ ہمارے لئے اپنا جانشین نامزد کیوں نہیں کرتے؟ آپ نے جواباً فرمایا: جب رسول اللہ صلی اللہ علیہ وسلم نے کسی کو اپنا جانشین نامزد نہیں کیا تو میں اپنا خلیفہ کسے نامزد کر سکتا ہوں البتہ یہ بات ضرور ہے کہ اگر اللہ تعالیٰ لوگوں کے ساتھ بھلائی کا ارادہ فرمائے گا تو میرے بعد ان کو کسی سب سے اچھے آدمی پر متفق فرما دے گا جیسا کہ رسول اللہ صلی اللہ علیہ وسلم کے بعد اس نے لوگوں کو سب سے اچھے انسان (یعنی سیدنا ابوبکر رضی اللہ عنہ) پر جمع کر دیا تھا۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4517]

سیدنا عبداللہ بن جعفر رضی اللہ عنہ فرماتے ہیں: جس ابوبکر رضی اللہ عنہ کو ہمارا امیر بنایا گیا یہ اللہ تعالیٰ کے بہترین خلیفہ ثابت ہوئے اور وہ ہم پر سب سے زیادہ رحم کرنے والے اور ہمارا سب سے زیادہ خیال رکھنے والے تھے۔ ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4518]

سیدنا انس رضی اللہ عنہ فرماتے ہیں: ہم اس حجرے میں گئے جہاں پر سیدنا ابوبکر رضی اللہ عنہ اس وقت موجود تھے، جب وہ اس درد میں مبتلا تھے جس میں ان کا انتقال ہوا، آپ نے ہم سے راز کی باتیں کہیں، پھر فرمایا: کیا تم ان امور پر راضی نہیں ہو جو میں نے سرانجام دئیے؟ ہم نے کہا: کیوں نہیں اے رسول اللہ صلی اللہ علیہ وسلم کے خلیفہ! ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4519]

سیدنا سعید بن المسیب رضی اللہ عنہ فرماتے ہیں: سیدنا ابوبکر رضی اللہ عنہ نے جب یزید بن ابوسفیان، عمرو بن العاص اور شرحبیل بن حسنہ کو لشکر دے کر شام کی طرف روانہ کیا تو ثنیۃ الوداع تک ان کے ہمراہ پیدل چلتے رہے، لوگوں نے کہا: اے رسول اللہ صلی اللہ علیہ وسلم کے خلیفہ! آپ پیدل چل رہے ہیں، اور ہم سوار ہیں؟ (یہ اچھا نہیں لگتا) ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4520]