ام المومنین سیدہ عائشہ رضی اللہ عنہا فرماتی ہیں: میں نے جنگ خندق کے موقع پر دحیہ بن خلیفہ کلبی رضی اللہ عنہ کی شکل کا ایک آدمی دیکھا، وہ سواری پر سوار تھا اور رسول اللہ صلی اللہ علیہ وسلم کے ساتھ کوئی راز داری کی بات کر رہا تھا، اس کے سر پر عمامہ تھا، جو کہ اس نے حضور صلی اللہ علیہ وسلم پر ڈھلکایا ہوا تھا، میں نے رسول اللہ صلی اللہ علیہ وسلم سے اس کے بارے میں پوچھا تو آپ صلی اللہ علیہ وسلم نے فرمایا: وہ جبریل امین علیہ السلام تھے، مجھے بنی قریظہ کی جانب جانے کا مشورہ دے رہے تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب اللباس/حدیث: 7600]

ام المومنین سیدہ عائشہ رضی اللہ عنہا فرماتی ہیں: ایک آدمی ترکی گھوڑے پر سوار ہو کر نبی اکرم صلی اللہ علیہ وسلم کی بارگاہ میں آیا، اس کے سر پر عمامہ تھا، اس نے اپنے عمامے کا شملہ دونوں کندھوں کے درمیان لٹکایا ہوا تھا، میں نے نبی اکرم صلی اللہ علیہ وسلم سے اس کے بارے میں پوچھا، آپ صلی اللہ علیہ وسلم نے فرمایا: تم نے جس کو دیکھا، وہ سیدنا جبریل امین علیہ السلام تھے۔ [المستدرك على الصحيحين/كتاب اللباس/حدیث: 7601]

سیدنا اسامہ بن زید رضی اللہ عنہما فرماتے ہیں: رسول اللہ صلی اللہ علیہ وسلم کے مرض کے زمانے میں ہم آپ صلی اللہ علیہ وسلم کی عیادت کے لئے آپ کے پاس گئے، حضور صلی اللہ علیہ وسلم اس وقت آرام فرما رہے تھے، اور عدنی چادر کے ساتھ چہرے کو ڈھانپا ہوا تھا، (جب ہم وہاں پہنچے تو) حضور صلی اللہ علیہ وسلم نے اپنے چہرے سے کپڑا ہٹایا، پھر فرمایا: اللہ تعالیٰ لعنت کرے یہودیوں پر، وہ جانوروں کی چربی (کھانے) کو حرام سمجھتے ہیں لیکن اس کو بیچ کر اس کی رقم کھا لیتے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب اللباس/حدیث: 7602]

سیدنا ابوہریرہ رضی اللہ عنہ فرماتے ہیں: رسول اللہ صلی اللہ علیہ وسلم نے ایسی عورتوں پر لعنت کی ہے جو مردوں جیسے کپڑے پہنتی ہیں اور ایسے مردوں پر بھی لعنت کی، جو عورتوں جیسے کپڑے پہنتے ہیں۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كتاب اللباس/حدیث: 7603]

ام المومنین سیدہ عائشہ رضی اللہ عنہا فرمایا کرتی تھیں۔ جب یہ آیت وَلْيَضْرِبْنَ بِخُمُرِهِنَّ عَلَى جُيُوبِهِنَّ (النور: 31) ” اور دوپٹے اپنے گریبانوں پر ڈالے رہیں “) نازل ہوئی تو عورتوں نے اپنی ازار کی چادریں پھاڑ کر، (ان میں سے کچھ کپڑا لے کر) اس کے ساتھ پردہ شروع کر دیا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كتاب اللباس/حدیث: 7604]

ام المومنین سیدہ ام سلمہ رضی اللہ عنہا فرماتی ہیں: نبی اکرم صلی اللہ علیہ وسلم ان کے پاس تشریف لائے، وہ اس وقت پردہ کئے ہوئے تھیں، آپ صلی اللہ علیہ وسلم نے فرمایا: اس دوپٹے کو اپنے سر کے گرد صرف ایک مرتبہ لپیٹو، دو مرتبہ نہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب اللباس/حدیث: 7605]

سیدنا عبداللہ بن مسعود رضی اللہ عنہ سے مروی ہے کہ نبی اکرم صلی اللہ علیہ وسلم دس باتوں کو ناپسند کرتے تھے۔ صفرہ یعنی خلوق (ایک قسم کی خوشبو ہے، جس کا جزء اعظم زعفران ہوتا ہے) بڑھاپے کو بدلنا۔ (یعنی کالا خضاب لگانا) تہبند ٹخنوں کے نیچے تک لٹکانا۔ سونے کی انگوٹھی پہننا۔ (کفر اور جادو وغیرہ کے) تعویذات باندھنا۔ قرآن کریم کی آیات کے علاوہ کوئی اور دم کرنا۔ نرد کے ساتھ کھیلنا۔ نامناسب مقام پر اپنی زینت ظاہر کرنا۔ اپنا پانی ناجائز جگہ بہانا۔ اور دودھ پیتے بچے کو خراب کرنا (یعنی دودھ پلانے والی عورت کے ساتھ وطی کرنا، کیونکہ اگر حمل قرار پا جائے تو دودھ خراب ہو جاتا ہے جس کی وجہ سے بچہ بیمار ہو جاتا ہے) مذکورہ تمام چیزیں اگرچہ حرام نہیں ہیں، تاہم حضور صلی اللہ علیہ وسلم ان کو پسند نہیں فرماتے تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب اللباس/حدیث: 7606]

سیدنا خریم بن فاتک رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: اگر تمہارے اندر دو باتیں نہ ہوں تو تم بہت اچھے آدمی ہو، انہوں نے پوچھا: یا رسول اللہ صلی اللہ علیہ وسلم وہ کون سی دو باتیں ہیں؟ آپ صلی اللہ علیہ وسلم نے فرمایا: تم اپنا تہبند ٹخنوں سے نیچے تک لٹکا لیتے ہو اور تم بال بہت بڑھاتے ہو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب اللباس/حدیث: 7607]

سیدنا عبداللہ بن عباس رضی اللہ عنہما فرماتے ہیں: نبی اکرم صلی اللہ علیہ وسلم نے قمیص پہنا، وہ ٹخنوں سے اوپر تھا اور اس کی آستینیں انگلیوں تک پہنچتی تھیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب اللباس/حدیث: 7608]

سیدنا عبداللہ بن عمر رضی اللہ عنہما فرماتے ہیں: سیدنا عمر رضی اللہ عنہ نے نئی قمیص پہنی، پھر فرمایا: اے بیٹے میری آستین کو کھینچ کر میری انگلیوں تک کر دو، اور جو اس سے زائد ہو اس کو کاٹ ڈالو، سیدنا عبداللہ فرماتے ہیں: میں نے ان کی دونوں آستینوں کا تھوڑا تھوڑا حصہ کاٹ دیا، اس طرح دونوں آستینیں چھوٹی بڑی ہو گئیں، میں نے کہا: اگر اس کو قینچی سے کاٹ دیا جائے تو اچھا ہو جائے گا، سیدنا عمر رضی اللہ عنہ نے فرمایا: اے بیٹے! رہنے دے، میں رسول اللہ صلی اللہ علیہ وسلم کو ایسے ہی کرتے دیکھا ہے۔ سیدنا عبداللہ بن عمر رضی اللہ عنہما نے کہا: پرانی ہونے تک وہ قمیص میرے والد محترم مسلسل پہنتے رہے، اور جب ہم نماز پڑھتے تو ہم اس کے دھاگے آپ کے قدموں پر گرتے ہوئے دیکھا کرتے تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب اللباس/حدیث: 7609]