رباح رضی اللہ عنہ کا بیان ہے کہ میرے گھر والوں نے اپنی ایک رومی لونڈی سے میری شادی کر دی۔ میں اس سے ہمبستر ہوا تو اس نے بچہ جنا، سیاہ رنگ کا، میری طرح۔ میں نے اس کا نام عبداللہ رکھا۔ میں پھر اس کے ساتھ ہمبستر ہوا تو اس نے کالے رنگ کا بچہ جنم دیا، جیسے کہ میں ہوں۔ میں نے اس کا نام عبیداللہ رکھا۔ پھر میرے گھر والوں کے ایک غلام یوحنہ نامی نے اس کے ساتھ خرابی کی، اس کے ساتھ اپنی رومی زبان میں باتیں کیں۔ چنانچہ اس نے بچہ جنا جیسے کہ کوئی «سَامُّ أَبْرَصَ» (گرگٹ) ہو، میں نے لونڈی سے پوچھا: ”یہ کیا ہے؟“ اس نے کہا: ”یہ یوحنہ سے ہے۔“ ہم نے اس کا مقدمہ سیدنا عثمان رضی اللہ عنہ کے سامنے پیش کیا۔ انہوں نے ان دونوں سے پوچھا تو انہوں نے اعتراف کر لیا۔ انہوں نے کہا: ”کیا تم راضی ہو کہ میں تم میں رسول اللہ صلی اللہ علیہ وسلم والا فیصلہ کروں؟ رسول اللہ صلی اللہ علیہ وسلم نے فیصلہ فرمایا ہے کہ بچہ بستر والے کا ہے۔“ راوی نے کہا: میرا خیال ہے پھر آپ نے ان دونوں کو درے لگائے اور وہ دونوں مملوک اور غلام تھے۔ [سنن ابي داود/كتاب تفريع أبواب الطلاق /حدیث: 2275]

سیدنا عبداللہ بن عمرو رضی اللہ عنہ بیان کرتے ہیں کہ ایک عورت نے کہا: ”اے اللہ کے رسول! میرا یہ بیٹا، میرا پیٹ اس کے لیے برتن، میرا سینہ اس کے لیے مشکیزہ اور میرا دامن اس کے لیے پناہ گاہ رہا ہے۔ اس کے باپ نے مجھے طلاق دے دی ہے اور چاہتا ہے کہ اس کو مجھ سے چھین لے۔“ رسول اللہ صلی اللہ علیہ وسلم نے اس سے فرمایا: ”تو اس کی زیادہ حقدار ہے جب تک کہ نکاح نہ کرے۔“ [سنن ابي داود/كتاب تفريع أبواب الطلاق /حدیث: 2276]

ابو میمونہ سلمی، اہل مدینہ میں سے کسی کا مولیٰ تھا اور وہ سچا آدمی تھا۔ اس کا بیان ہے کہ میں سیدنا ابوہریرہ رضی اللہ عنہ کے پاس بیٹھا ہوا تھا کہ ان کے پاس ایک فارسی عورت آئی، اس کے ساتھ اس کا بیٹا بھی تھا۔ شوہر اور بیوی دونوں اس بچے کے دعویدار تھے، اور شوہر نے عورت کو طلاق دے دی تھی۔ عورت نے کہا اور فارسی زبان میں بولی: ”اے ابوہریرہ! میرا شوہر میرے بیٹے کو مجھ سے لے لینا چاہتا ہے۔“ سیدنا ابوہریرہ رضی اللہ عنہ نے کہا: ”اس پر قرعہ ڈال لو“، اور اس کو یہ فارسی میں کہا۔ پھر اس کا شوہر آیا تو اس نے کہا: ”کون ہے جو مجھ سے میرا بیٹا چھینے؟“ سیدنا ابوہریرہ رضی اللہ عنہ نے کہا: «اَللّٰهُمَّ» ”اے اللہ!“ (یہ لفظ بطور تبرک بولا جاتا تھا) ”میرا یہ کہنا اس بنا پر ہے کہ میں نے ایک عورت کو سنا تھا جو رسول اللہ صلی اللہ علیہ وسلم کی خدمت میں آئی تھی اور میں بھی آپ کے پاس بیٹھا ہوا تھا، اس نے کہا: ”اے اللہ کے رسول! میرا شوہر میرے بچے کو لے لینا چاہتا ہے، حالانکہ یہ مجھے ابو عنبہ کے کنویں سے پانی لا کر دیتا ہے اور میری خدمت کرتا ہے۔“ رسول اللہ صلی اللہ علیہ وسلم نے فرمایا: ”اس پر قرعہ ڈال لو۔“ تو شوہر نے کہا: ”مجھ سے میرا بیٹا کون چھین سکتا ہے؟“ تو نبی کریم صلی اللہ علیہ وسلم نے فرمایا: ”(لڑکے!) یہ تیرا باپ ہے اور یہ تیری ماں ہے، جس کا چاہے ہاتھ پکڑ لے۔“ چنانچہ اس نے اپنی ماں کا ہاتھ پکڑ لیا، اور وہ اسے لے کر چل دی۔“ [سنن ابي داود/كتاب تفريع أبواب الطلاق /حدیث: 2277]

سیدنا علی رضی اللہ عنہ نے بیان کیا کہ سیدنا زید بن حارثہ رضی اللہ عنہ مکہ آئے اور حمزہ رضی اللہ عنہ کی بیٹی کو ساتھ لے آئے۔ تو سیدنا جعفر رضی اللہ عنہ نے کہا: ”میں اسے (اپنی تولیت میں) لیتا ہوں، میں اس کا زیادہ حقدار ہوں۔ یہ میرے چچا کی بیٹی ہے اور اس کی خالہ میری زوجیت میں ہے، اور «الْخَالَةُ بِمَنْزِلَةِ الْأُمِّ» ”خالہ بمنزلہ ماں کے ہوتی ہے۔““ اور سیدنا علی رضی اللہ عنہ نے کہا: ”میں اس کا زیادہ حقدار ہوں۔ یہ میرے چچا کی بیٹی ہے اور میرے گھر میں رسول اللہ صلی اللہ علیہ وسلم کی صاحبزادی ہے اور وہ اس کی زیادہ حقدار ہے۔“ اور سیدنا زید رضی اللہ عنہ نے کہا: ”میں اس کا زیادہ حقدار ہوں۔ میں ہی اس کے پاس گیا، سفر کیا اور اس کو لے کر آیا ہوں۔“ پھر نبی کریم صلی اللہ علیہ وسلم تشریف لائے اور بات کی اور فرمایا: ”لڑکی کا فیصلہ میں جعفر رضی اللہ عنہ کے حق میں کرتا ہوں کہ اپنی خالہ کے پاس رہے گی اور «الْخَالَةُ بِمَنْزِلَةِ الْأُمِّ» ”خالہ بمنزلہ ماں کے ہوتی ہے۔““ [سنن ابي داود/كتاب تفريع أبواب الطلاق /حدیث: 2278]

عبدالرحمٰن بن ابی لیلیٰ رحمہ اللہ نے یہ روایت بیان کی مگر کامل بیان نہیں کی اور کہا کہ ”آپ صلی اللہ علیہ وسلم نے بچی جعفر رضی اللہ عنہ کو دے دی کیونکہ اس کی خالہ ان کے ہاں ہے۔“ [سنن ابي داود/كتاب تفريع أبواب الطلاق /حدیث: 2279]

سیدنا علی رضی اللہ عنہ سے مروی ہے کہ جب ہم مکہ سے نکلے تو حمزہ رضی اللہ عنہ کی بیٹی ہمارے پیچھے آ گئی، وہ ”چچا، چچا“ پکار رہی تھی۔ پس سیدنا علی رضی اللہ عنہ نے اس کو لیا اور اس کا ہاتھ پکڑا اور (سیدہ فاطمہ رضی اللہ عنہا سے) کہا: ”اپنی چچا زاد کو لے لو۔“ چنانچہ سیدہ فاطمہ رضی اللہ عنہا نے اس کو اٹھا لیا اور خبر بیان کی۔ سیدنا جعفر رضی اللہ عنہ نے کہا: ”یہ میرے چچا کی بیٹی ہے اور اس کی خالہ میری زوجیت میں ہے۔“ چنانچہ رسول اللہ صلی اللہ علیہ وسلم نے اس کا فیصلہ خالہ کے حق میں کر دیا اور فرمایا: ”خالہ ماں کی طرح ہوتی ہے۔“ [سنن ابي داود/كتاب تفريع أبواب الطلاق /حدیث: 2280]

سیدہ اسماء بنت یزید بن سکن انصاریہ رضی اللہ عنہا سے مروی ہے کہ ”انہیں رسول اللہ صلی اللہ علیہ وسلم کے زمانے میں طلاق ہو گئی، اور (اس سے پہلے) مطلقہ کے لیے کوئی عدت نہ ہوتی تھی (یعنی ایام انتظار) تو اللہ تعالیٰ نے اس اسماء رضی اللہ عنہا کی طلاق کے موقع پر عدت کا حکم نازل فرمایا، اور یہ پہلی عورت تھی جس کے سلسلے میں طلاق یافتہ عورت کی عدت کا حکم اترا۔“ [سنن ابي داود/كتاب تفريع أبواب الطلاق /حدیث: 2281]

سیدنا ابن عباس رضی اللہ عنہما سے مروی ہے کہ (اللہ کا جو فرمان ہے) ﴿وَالْمُطَلَّقَاتُ يَتَرَبَّصْنَ بِأَنْفُسِهِنَّ ثَلَاثَةَ قُرُوءٍ﴾ [سورة البقرة: 228] ”طلاق والی عورتیں تین حیض انتظار کریں۔“ (تو اس سے وہ عورتیں نکال دی گئیں جو حیض سے مایوس ہو جائیں) اور ان کے لیے کہا کہ ﴿وَاللَّائِي يَئِسْنَ مِنَ الْمَحِيضِ مِنْ نِسَائِكُمْ إِنِ ارْتَبْتُمْ فَعِدَّتُهُنَّ ثَلَاثَةُ أَشْهُرٍ﴾ [سورة الطلاق: 4] ”تمہاری جو عورتیں حیض سے مایوس ہوں، اگر تمہیں کوئی شبہ ہو تو ان کی عدت تین ماہ ہے۔“ پھر ان میں سے مزید یہ استثنا فرمایا: ﴿يَا أَيُّهَا الَّذِينَ آمَنُوا إِذَا نَكَحْتُمُ الْمُؤْمِنَاتِ ثُمَّ طَلَقْتُمُوهُنَّ مِنْ قَبْلِ أَنْ تَمَسُّوهُنَّ فَمَا لَكُمْ عَلَيْهِنَّ مِنْ عِدَّةٍ تَعْتَدُّونَهَا﴾ [سورة الأحزاب: 49] ”اگر تم انہیں مساس سے قبل ہی طلاق دے دو تو ان پر کوئی عدت نہیں۔“ [سنن ابي داود/كتاب تفريع أبواب الطلاق /حدیث: 2282]

سیدنا عمر رضی اللہ عنہ سے مروی ہے کہ ”نبی کریم صلی اللہ علیہ وسلم نے سیدہ حفصہ رضی اللہ عنہا کو طلاق دے دی، مگر پھر آپ صلی اللہ علیہ وسلم نے ان سے رجوع کر لیا۔“ [سنن ابي داود/كتاب تفريع أبواب الطلاق /حدیث: 2283]

سیدہ فاطمہ بنت قیس رضی اللہ عنہا سے مروی ہے کہ (ان کے شوہر) ابوعمرو بن حفص نے ان کو طلاقِ بتہ دے دی تھی (مختلف اوقات میں تین طلاقیں) اور وہ خود (گھر میں) موجود نہیں تھے۔ تو ان کے وکیل نے فاطمہ کی طرف کچھ ”جَو“ بھیجے تو انہوں نے ان کو کم سمجھا اور اس پر راضی نہ ہوئیں۔ تو وکیل نے کہا: ”قسم اللہ کی! (اخراجات کے سلسلے میں) تیرے لیے ہم پر کوئی چیز واجب ہی نہیں ہے۔“ تو وہ رسول اللہ صلی اللہ علیہ وسلم کے پاس آئیں اور آپ سے اس کا ذکر کیا، آپ نے اس سے فرمایا: ”اس کے ذمے تمہارا کوئی خرچ نہیں ہے۔“ اور اسے حکم دیا کہ ام شریک کے گھر میں عدت گزارے۔ پھر فرمایا: ”اس عورت کے ہاں میرے صحابہ آتے رہتے ہیں، تو ابن ام مکتوم کے گھر میں عدت گزارو۔ وہ نابینا آدمی ہے، تمہیں اپنے کپڑے اتارنے میں بھی آسانی رہے گی اور جب تم حلال ہو جاؤ (تمہارے ایام عدت گزر جائیں) تو مجھے اطلاع دینا۔“ کہتی ہیں کہ جب میں حلال ہو گئی تو میں نے آپ صلی اللہ علیہ وسلم کو بتایا کہ معاویہ بن ابی سفیان اور ابوجہم نے مجھے نکاح کا پیغام بھیجا ہے۔ تو رسول اللہ صلی اللہ علیہ وسلم نے فرمایا: ”ابوجہم تو اپنے کندھے سے لٹھ ہی نہیں اتارتا ہے۔ اور معاویہ، تو وہ فقیر آدمی ہے، اس کے پاس کوئی مال نہیں ہے۔ تم اسامہ بن زید سے نکاح کر لو۔“ کہتی ہیں کہ میں نے اس کو ناپسند کیا۔ آپ نے پھر فرمایا: ”اسامہ بن زید سے نکاح کر لو۔“ چنانچہ میں نے ان سے نکاح کر لیا۔ اللہ تعالیٰ نے اس میں بہت خیر (اور برکت) فرمائی اور اس وجہ سے مجھ پر رشک کیا جاتا تھا۔ [سنن ابي داود/كتاب تفريع أبواب الطلاق /حدیث: 2284]