حضرت صبی بن معبد رضی اللہ عنہ بیان کرتے ہیں کہ میں اعرابی اور عیسائی تھا، پھر میں مسلمان ہو گیا۔ مجھے جہاد کا بہت شوق تھا لیکن مجھے پتہ چلا کہ مجھ پر تو حج اور عمرہ فرض ہیں۔ میں اپنے قبیلے کے ایک آدمی کے پاس آیا جن کا نام ہریم بن عبداللہ تھا۔ میں نے ان سے اس بارے میں پوچھا تو انہوں نے کہا: دونوں بیک وقت کر لو، پھر قربانی کا جو جانور میسر ہو ذبح کر دینا۔ میں نے دونوں کا احرام باندھ لیا۔ جب ہم عذیب مقام پر پہنچے تو مجھے سلمان بن ربیعہ اور حضرت زید بن صوحان رضی اللہ عنہ ملے۔ میں حج اور عمرے کی «لَبَّيْكَ» ”میں حاضر ہوں“ کہہ رہا تھا تو ان میں سے ایک نے دوسرے سے کہا کہ یہ شخص تو اپنے اونٹ سے زیادہ سمجھ دار معلوم نہیں ہوتا۔ میں حضرت عمر رضی اللہ عنہ کے پاس حاضر ہوا اور عرض کی: اے امیر المؤمنین! میں نے اسلام قبول کیا ہے۔ مجھے جہاد کا بہت شوق ہے لیکن میں نے حج اور عمرہ اپنے آپ پر فرض پایا ہے۔ میں ہریم بن عبداللہ کے پاس گیا۔ میں نے کہا: اے ہریم! میں نے اپنے آپ پر حج اور عمرہ دونوں کو فرض پایا ہے (تو میں کیا کروں؟) انہوں نے کہا: دونوں کا احرام اکٹھا باندھ لو، پھر جو قربانی میسر ہو، ذبح کر دینا۔ میں نے دونوں کا احرام باندھ لیا۔ جب میں عذیب مقام پر پہنچا تو مجھے سلمان بن ربیعہ اور زید بن صوحان ملے تو ان میں سے ایک نے دوسرے سے کہا: یہ اپنے اونٹ سے زیادہ سمجھ دار نہیں۔ حضرت عمر رضی اللہ عنہ نے فرمایا: تمہیں تمہارے نبی صلی اللہ علیہ وسلم کی سنت کی توفیق ملی ہے۔ [سنن نسائي/كتاب مناسك الحج/حدیث: 2720]

حضرت عبسی رضی اللہ عنہ نے (مذکورہ بالا) کے مثل حدیث بیان کی، انہوں نے کہا: پھر میں حضرت عمر رضی اللہ عنہ کی خدمت میں حاضر ہوا، پھر پورا قصہ (واقعہ) بیان کیا لیکن «يَا هَنَاهُ» ”اے وہ ہریم!“ کے الفاظ بیان نہیں کیے۔ [سنن نسائي/كتاب مناسك الحج/حدیث: 2721]

حضرت شقیق بن سلمہ ابو وائل رحمہ اللہ سے روایت ہے کہ بنو تغلب کے ایک شخص جنہیں صبی بن معبد رضی اللہ عنہ کہا جاتا تھا اور وہ پہلے عیسائی تھے، پھر وہ مسلمان ہو گئے، اپنے پہلے حج کو آئے تو انہوں نے حج اور عمرہ کی بیک وقت «لَبَّيْكَ» ”میں حاضر ہوں“ کہی۔ وہ اسی طرح دونوں کی بیک وقت «لَبَّيْكَ» ”میں حاضر ہوں“ کہتے جا رہے تھے کہ ان کا گزر سلمان بن ربیعہ رضی اللہ عنہ اور زید بن صوحان رضی اللہ عنہ کے قریب سے ہوا تو ان میں سے ایک نے کہا: تو تو اپنے اس اونٹ سے بھی کم عقل ہے۔ حضرت صبی رضی اللہ عنہ نے کہا: مجھے اس بات سے بہت پریشانی ہوئی حتیٰ کہ میں حضرت عمر بن خطاب رضی اللہ عنہ سے ملا تو میں نے یہ ساری بات ان کے گوش گزار کی۔ وہ فرمانے لگے: تمہیں تمہارے نبی صلی اللہ علیہ وسلم کی سنت مطہرہ کی توفیق ملی ہے۔ حضرت شقیق رحمہ اللہ نے کہا: میں اور حضرت مسروق بن اجدع رحمہ اللہ حضرت صبی بن معبد رضی اللہ عنہ کے پاس بکثرت آتے جاتے تھے اور ان سے یہ واقعہ سنانے کی گزارش کرتے تھے۔ [سنن نسائي/كتاب مناسك الحج/حدیث: 2722]

حضرت مروان بن حکم سے روایت ہے کہ میں حضرت عثمان رضی اللہ عنہ کے پاس بیٹھا ہوا تھا کہ انہوں نے حضرت علی رضی اللہ عنہ کو حج اور عمرے کی اکٹھی «لَبَّيْكَ» ”لبیک“ کہتے سنا، حضرت عثمان رضی اللہ عنہ فرمانے لگے: کیا آپ کو علم نہیں کہ اس سے روکا گیا ہے؟ حضرت علی رضی اللہ عنہ فرمانے لگے: یقیناً علم ہے مگر میں نے رسول اللہ صلی اللہ علیہ وسلم کو دونوں کی اکٹھی «لَبَّيْكَ» ”لبیک“ کہتے سنا ہے، میں تمہارے حکم کی وجہ سے نبی صلی اللہ علیہ وسلم کا فرمان نہیں چھوڑ سکتا۔ [سنن نسائي/كتاب مناسك الحج/حدیث: 2723]

حضرت مروان سے روایت ہے کہ حضرت عثمان رضی اللہ عنہ نے تمتع اور قران سے روکا تو حضرت علی رضی اللہ عنہ نے علانیہ حج اور عمرے کی اکٹھی «لَبَّيْكَ» ”لبیک“ پڑھی۔ حضرت عثمان رضی اللہ عنہ نے فرمایا: آپ ایسا کرتے ہیں جبکہ میں نے اس سے روک رکھا ہے؟ حضرت علی رضی اللہ عنہ نے فرمایا: لوگوں میں سے کسی شخص کے کہنے سے میں رسول اللہ صلی اللہ علیہ وسلم کی سنت نہیں چھوڑ سکتا۔ [سنن نسائي/كتاب مناسك الحج/حدیث: 2724]

نضر نے شعبہ سے اسی سند سے اس جیسی روایت کی ہے۔ [سنن نسائي/كتاب مناسك الحج/حدیث: 2725]

حضرت براء رضی اللہ عنہ سے مروی ہے کہ جب رسول اللہ صلی اللہ علیہ وسلم نے حضرت علی رضی اللہ عنہ کو یمن کا امیر بنایا تو میں بھی ان کے ساتھ تھا۔ جب وہ (حجۃ الوداع کے موقع پر یمن سے) رسول اللہ صلی اللہ علیہ وسلم کے پاس آئے تو حضرت علی رضی اللہ عنہ نے فرمایا: میں آیا تو رسول اللہ صلی اللہ علیہ وسلم نے فرمایا: ”تو نے احرام کیسے باندھا ہے؟“ میں نے عرض کیا: میں نے تو آپ کے احرام کی طرح احرام باندھا ہے۔ آپ صلی اللہ علیہ وسلم نے فرمایا: ”میں تو قربانی کے جانور بھی ساتھ لایا ہوں اور میں نے حج و عمرے کا اکٹھا احرام باندھا ہے۔“ آپ صلی اللہ علیہ وسلم نے اپنے صحابہ سے فرمایا تھا: ”اگر مجھے اس حکم کا پہلے پتا چل جاتا جس کا بعد میں پتا چلا (یعنی عمرے کے وجوب کا) تو میں اسی طرح کرتا جیسے تم نے کیا، لیکن میں تو قربانی کے جانور ساتھ لایا ہوں، لہٰذا میرا حج وعمرہ اکٹھا ہوگا۔“ [سنن نسائي/كتاب مناسك الحج/حدیث: 2726]

حضرت عمران بن حصین رضی اللہ عنہ بیان کرتے ہیں کہ رسول اللہ صلی اللہ علیہ وسلم نے حج اور عمرہ اکٹھا کیا، پھر آپ فوت ہو گئے، نہ تو آپ نے (اس سے) روکا اور نہ قرآن میں اس کی حرمت کا حکم نازل ہوا۔ [سنن نسائي/كتاب مناسك الحج/حدیث: 2727]

حضرت عمران رضی اللہ عنہ سے روایت ہے کہ رسول اللہ صلی اللہ علیہ وسلم نے حج و عمرہ اکٹھا کیا، پھر (اس سے روکنے کے بارے میں) کوئی حکم نازل نہیں ہوا، نہ رسول اللہ صلی اللہ علیہ وسلم نے اس سے منع فرمایا۔ (بعد میں) ایک شخص (حضرت عمر رضی اللہ عنہ) نے اپنی رائے سے اس کے بارے میں جو چاہا، کیا۔ [سنن نسائي/كتاب مناسك الحج/حدیث: 2728]

حضرت عمران بن حصین رضی اللہ عنہ بیان کرتے ہیں کہ ہم نے رسول اللہ صلی اللہ علیہ وسلم کے ساتھ تمتع کیا۔ امام ابوعبدالرحمن (نسائی) رحمہ اللہ بیان کرتے ہیں کہ اسماعیل بن مسلم نام کے تین راویِ حدیث ہیں، ان میں سے ایک تو یہی ہیں، ان پر کوئی اعتراض نہیں۔ دوسرے بزرگ وہ ہیں جو ابوالطفیل سے بیان کرتے ہیں، ان میں بھی کوئی خرابی نہیں۔ تیسرے اسماعیل بن مسلم حضرت زہری اور حضرت حسن سے بیان کرتے ہیں، وہ محدثین کے نزدیک «مَتْرُوكُ الْحَدِيثِ» (غیر معتبر) ہیں۔ [سنن نسائي/كتاب مناسك الحج/حدیث: 2729]