بنو مرہ کے ایک صاحب روایت کرتے ہیں کہ میں جناب رسول اللہ صلی اللہ علیہ وآلہ وسلم کی خدمت میں حاضر ہوا اور میں نے عرض کیا۔ یا رسول اللہ صلی اللہ علیہ وآلہ وسلم! میرا زیادہ ترمال (مویشی) گدھوں پر مشتمل ہے۔ کیا میں ان میں سے کھا سکتا ہوں؟ آپ صلی اللہ علیہ وآلہ وسلم نے فرمایا: ’ کیا وہ جنگل میں نہیں چرتے اور کیا وہ درخت نہیں کھاتے؟“ میں نے عرض کیا۔ کیوں نہیں۔ آپ صلی اللہ علیہ وآلہ وسلم نے فرمایا: پھر تم ان میں سے کھالو۔ [مصنف ابن ابي شيبه/كتاب الأطعمة/حدیث: 25926]

حضرت غالب بن ذیخ سے روایت ہے۔ وہ کہتے ہیں کہ میں نے عرض کیا۔ یا رسول اللہ صلی اللہ علیہ وآلہ وسلم! ہمیں قحط سالی نے آلیا ہے۔ اور میرا صحت مند مال مویشی گدھے ہیں۔ آپ صلی اللہ علیہ وآلہ وسلم نے فرمایا: ”تم اپنے صحت مند مال مویشی میں سے کھاؤ۔ میں نے انہیں آوارہ اور گندخوری کی وجہ سے ناپسند کیا تھا۔“ [مصنف ابن ابي شيبه/كتاب الأطعمة/حدیث: 25927]

حضرت عبد الرحمن بن ابی لیلیٰ سے روایت ہے کہ گدھوں کے گوشت کو باربرداری کی ضرورت کے لیے مکروہ قرار دیا گیا۔ [مصنف ابن ابي شيبه/كتاب الأطعمة/حدیث: 25928]

مزینہ ظاہر ہ کے کچھ لوگ روایت کرتے ہیں کہ حضرت غالب بن ابجر نے بتایا کہ میں نے جناب رسول اللہ صلی اللہ علیہ وآلہ وسلم سے سوال کیا۔ میں نے کہا۔ میرے مال میں سے صرف گدھے باقی رہ گئے ہیں؟ آپ صلی اللہ علیہ وآلہ وسلم نے فرمایا: ”اپنے گھر والوں کو اپنے مال کا موٹا حصہ کھلاؤ۔“ اور فرمایا: ”مں ا تو تمہارے لئے صرف گند خور آوارہ کو ناپسند کرتا ہوں۔“ [مصنف ابن ابي شيبه/كتاب الأطعمة/حدیث: 25929]

حضرت عبد الرحمن بن حسنہ سے روایت ہے۔ وہ کہتے ہیں کہ میں جناب رسول اللہ صلی اللہ علیہ وآلہ وسلم کے ہمراہ ایک سفر میں تھا۔ ہمیں کچھ گوہ ملیں۔ چناچہ ہانڈیاں (گوہ کے ساتھ) اُبلنے لگیں۔ جناب رسول اللہ صلی اللہ علیہ وآلہ وسلم نے پوچھاـ۔ ”یہ کیا ہے؟“ ہم نے جواب دیا۔ ہمیں کچھ گوہ مل گیی تھیں۔ آپ صلی اللہ علیہ وآلہ وسلم نے فرمایا۔ ”بنی اسرائیل کے کچھ لوگ مسخ کر دئیے گئے تھے۔ مجھے ڈر ہے کہ یہ وہی نہ ہو۔“ راوی کہتے ہیں۔ چناچہ ہم نے ہانڈیوں کو الٹ دیا جبکہ ہم سخت بھوکے تھے۔ [مصنف ابن ابي شيبه/كتاب الأطعمة/حدیث: 25930]

حضرت ابن عمر رضی اللہ عنہما سے روایت ہے۔ وہ کہتے ہیں کہ جناب رسول اللہ صلی اللہ علیہ وآلہ وسلم سے سوال کیا گیا گوہ کے بارے میں جبکہ آپ صلی اللہ علیہ وآلہ وسلم منبرپر تھے؟ تو آپ صلی اللہ علیہ وآلہ وسلم نے ارشاد فرمایا: ”میں گوہ کو کھاتا ہوں اور نہ حرام کہتا ہوں۔“ [مصنف ابن ابي شيبه/كتاب الأطعمة/حدیث: 25931]

حضرت ابو سعید خدری سے روایت ہے، وہ کہتے ہیں کہ جناب رسول اللہ صلی اللہ علیہ وآلہ وسلم کی خدمت اقدس میں ایک آدمی حاضر ہوا اور اس نے عرض کیا۔ ہم لوگ ایسی زمین میں رہائش پذیر ہیں جہاں گوہ بہت زیادہ ہیں۔ پس آپ مجھے کیا حکم دیتے ہیں؟ آپ صلی اللہ علیہ وآلہ وسلم نے ارشاد فرمایا: ”بنی اسرائیل میں سے کچھ لوگ جانوروں کی طرف مسخ کئے گئے تھے۔ مجھے معلوم نہیں کہ وہ کن جانوروں کی طرف مسخ ہوئے تھے۔“ پس آپ صلی اللہ علیہ وآلہ وسلم نے اس کو نہ کھانے کا حکم دیا اور نہ اس کو گوہ سے منع فرمایا۔ [مصنف ابن ابي شيبه/كتاب الأطعمة/حدیث: 25932]

حضرت ثابت بن ودیعہ سے روایت ہے۔ وہ کہتے ہیں کہ جناب رسول اللہ صلی اللہ علیہ وآلہ وسلم کے پاس ایک گوہ لائی گئی تو آپ صلی اللہ علیہ وآلہ وسلم نے فرمایا: ”ایک قوم مسخ ہوئی تھی۔“ واللہ اعلم۔“ [مصنف ابن ابي شيبه/كتاب الأطعمة/حدیث: 25933]

حضرت اسود، حضرت عائشہ رضی اللہ عنہا سے روایت کرتے ہیں کہتے ہیں کہ جناب رسول اللہ صلی اللہ علیہ وآلہ وسلم کو گوہ ہدیہ کی گئی لیکن آپ صلی اللہ علیہ وآلہ وسلم نے اس میں سے نہ کھایا۔ حضرت عائشہ رضی اللہ عنہا کہتی ہیں۔ میں نے عرض کیا۔ یا رسول اللہ صلی اللہ علیہ وآلہ وسلم کیا میں یہ مانگنے والوں کو نہ کھلا دوںـ؟ آپ صلی اللہ علیہ وآلہ وسلم نے فرمایا: ”تم مانگنے والوں کو وہ چیز نہ کھلاؤ جس میں سے تم خود نہیں کھاتی۔“ [مصنف ابن ابي شيبه/كتاب الأطعمة/حدیث: 25934]

جناب نبی کریم صلی اللہ علیہ وآلہ وسلم کی زوجہ محترمہ حضرت میمونہ سے روایت ہے۔ وہ کہتی ہیں کہ ہمیں ہدیہ میں ایک گوہ دی گئی۔ میں نے اس کو تیار کیا۔ پھر حضرت میمونہ کے پاس ان کی قوم کے دو افراد آئے تو حضرت میمونہ نے یہ گوہ ان کو تحفۃً پیش کردی۔ اس دوران جناب رسول اللہ صلی اللہ علیہ وآلہ وسلم اندر تشریف لائے جبکہ یہ دونوں حضرات (اس کو) کھا رہے تھے۔ پس آپ صلی اللہ علیہ وآلہ وسلم نے اپنا ہاتھ مبارک رکھا پھر اس کو اٹھا لیا اور فرمایا: ”یہ کیا ہے؟“ حضرت میمونہ نے کہا۔ یہ گوہ ہے جو مجھے ہدیہ میں دی گئی تھی اور میں نے اس کو تیار کیا ہے۔ پس آپ صلی اللہ علیہ وآلہ وسلم نے اس کو رکھ دیا۔ اس پر ان دونوں کے ہاتھ میں جو لقمہ تھا اس کو وہ بھی نیچے رکھنے لگے۔ جناب نبی کریم صلی اللہ علیہ وآلہ وسلم نے ان دونوں سے فرمایا: ”تم کھاؤ۔ کیونکہ تم دونوں اہل نجد ہو۔ تم اس کو کھاتے ہو۔ لیکن ہم اہل مدینہ ہیں۔ ہمیں اس سے گھن آتی ہے۔“ [مصنف ابن ابي شيبه/كتاب الأطعمة/حدیث: 25935]