حضرت ابن عمر رضی اللہ عنہما سے روایت ہے وہ کہتے ہیں کہ کوئی بندہ ایمان کی حقیقت کو نہیں پہنچ سکتا یہاں تک کہ وہ لوگوں کو اپنے دین کے بارے میں احمق شمار نہ کرنے لگے۔ [مصنف ابن ابي شيبه/كتاب الزهد/حدیث: 37354]

حضرت سعید بن جبیر سے روایت ہے وہ کہتے ہیں کہ میں حضرت ابن عمر رضی اللہ عنہما کے پاس حاضر ہوا تو میں نے دیکھا کہ وہ اپنی کہنیاں بچھائے ہوئے تھے اور ایسے تکیہ پر ٹیک لگائے ہوئے تھے جس میں کھجور کی چھال بھری ہوئی تھی۔ [مصنف ابن ابي شيبه/كتاب الزهد/حدیث: 37355]

حضرت ابن عمر رضی اللہ عنہما سے روایت ہے وہ کہتے ہیں کہ مومن کے قبر سے نکلنے کے وقت اس کی دیکھی ہوئی صورتوں میں سے بہترین صورت اس کا استقبال کرے گی۔ مومن اس سے کہے گا۔ تم کون ہو؟ وہ مومن سے کہے گی میں وہی ہوں جو دنیا میں تیرے ساتھ تھی۔ میں تمہیں جنت میں داخل کروانے تک نہیں چھوڑوں گا۔ [مصنف ابن ابي شيبه/كتاب الزهد/حدیث: 37356]

حضرت قتادہ سے روایت ہے وہ کہتے ہیں کہ حضرت ابن عمر رضی اللہ عنہما سے پوچھا گیا کہ جناب نبی کریم صلی اللہ علیہ وآلہ وسلم کے صحابہ ایک دوسرے کے ساتھ ہنسی کیا کرتے تھے؟ آپ نے فرمایا: ہاں۔ لیکن ان کے دلوں میں ایمان پہاڑوں سے بھی زیادہ مضبوط ہوتا تھا۔ [مصنف ابن ابي شيبه/كتاب الزهد/حدیث: 37357]

ایک صاحب بیان کرتے ہیں کہ حضرت ابن عمر رضی اللہ عنہما کو جب کوئی آدمی جناب نبی کریم صلی اللہ علیہ وآلہ وسلم کی سنتوں کی پیروی کرتے دیکھتا تو وہ یہ گمان کرتا کہ ان پر کسی شے کا اثر ہے۔ [مصنف ابن ابي شيبه/كتاب الزهد/حدیث: 37358]

حضرت عمرو سے روایت ہے کہ حضرت ابن عمر رضی اللہ عنہما فرماتے تھے۔ جب سے جناب نبی کریم صلی اللہ علیہ وآلہ وسلم کی روح مبارک قبض ہوئی ہے میں نے ایک اینٹ، اینٹ پر نہیں رکھی اور نہ ہی کوئی درخت لگایا ہے۔ [مصنف ابن ابي شيبه/كتاب الزهد/حدیث: 37359]

حضرت ابن عمر رضی اللہ عنہما کے بارے میں روایت ہے کہ وہ ان نشانات کی طرف رخ کرکے نماز پڑھنے کو ناپسند کرتے تھے جو مروان نے پتھر سے بنائے تھے۔ [مصنف ابن ابي شيبه/كتاب الزهد/حدیث: 37360]

حضرت ابوسہل کہتے ہیں کہ میں نے اس آیت { کُلُّ نَفْسٍ بِمَا کَسَبَتْ رَہِینَۃٌ إِلاَّ أَصْحَابَ الْیَمِینِ } کے بارے میں حضرت ابن عمر رضی اللہ عنہما کو سنا۔ آپ رضی اللہ عنہ نے فرمایا: یہ مسلمانوں کے بچوں کا ذکر ہے۔ [مصنف ابن ابي شيبه/كتاب الزهد/حدیث: 37361]

حضرت ابن عمر رضی اللہ عنہما کے بارے میں روایت ہے کہ انہوں نے حمران سے فرمایا: تم ایسی ذمہ داری کے ساتھ خدا کی ملاقات نہ کرنا جس کے پورا کرنے کے لیے کچھ نہ ہو کیونکہ قیامت کے دن کوئی درہم و دینار نہیں ہوگا۔ اور لوگوں کو صرف ان کے اعمال کے ذریعہ جزا دی جائے گی۔ [مصنف ابن ابي شيبه/كتاب الزهد/حدیث: 37362]

حضرت ابن عمر رضی اللہ عنہما کے بارے میں روایت ہے کہ وہ فرمایا کرتے تھے۔ میں نے اپنے ساتھیوں کو ایک امر پر پایا ہے۔ پس اگر میں ان کی مخالفت کروں تو مجھے ڈر ہے کہ کہیں میں ان کو نہ مل سکوں۔ [مصنف ابن ابي شيبه/كتاب الزهد/حدیث: 37363]