سیدنا عبداللہ بن بریدہ اسلمی رضی اللہ عنہ اپنے والد سے روایت کرتے ہیں کہ نبی اکرم صلی اللہ علیہ وسلم نے ایک شخص کو یوں دعا مانگتے سُنا: اَللّٰھُمَّ اِنِّیْ اَسْاَلُکَ بِاَنَّکَ اَنْتَ لَا اِلٰہَ اِلَّا اَنْتَ، الْاَحَدُ الصَّمَدُ الَّذِیْ لَمْ یَلِدْ وَلَم یُوْلَد، وَلَمْ یَکُنْ لَّہُ کُفُوًا اَحَدٌ۔ “ تو رسول اللہ صلی اللہ علیہ وسلم نے فرمایا: اس نے اللہ تعالیٰ سے اس کے اس اسمِ اعظم کے ساتھ دعا مانگی ہے کہ جب بھی اس کے ساتھ دعا مانگو قبول ہوتی ہے اور جب بھی اس کے ساتھ سوال کرو تو پورا کیا جاتا ہے۔ ٭٭ یہ حدیث امام بخاری رحمۃ اللہ علیہ و امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ اور اس حدیث کی ایک شاہد حدیث بھی موجود ہے جو کہ امام مسلم رحمۃ اللہ علیہ کے معیار کے مطابق صحیح ہے۔ (جیسا کہ درج ذیل ہے) [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1879]

سیدنا ابن بریدہ رضی اللہ عنہ اپنے والد سے روایت کرتے ہیں کہ نبی اکرم صلی اللہ علیہ وسلم نے ایک شخص کو یوں دعا مانگتے سُنا: اَللّٰھُمَّ اِنِّیْ اَسْاَلُکَ بِاَنَّکَ اَحَدٌ الصَّمَدٌ لَمْ یَلِدْ، وَلَم یُوْلَد، وَلَمْ یَکُنْ لَّہُ کُفُوًا اَحَد ٌ۔ “ تو رسول اللہ صلی اللہ علیہ وسلم نے فرمایا: اس شخص نے اللہ تعالیٰ سے اس کے اس اسمِ اعظم کے ساتھ دعا مانگی ہے کہ جب اس کے ساتھ دعا مانگی جائے تو قبول ہوتی ہے اور جب اس کے ساتھ مانگا جائے تو عطا کیا جاتا ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1880]

سیدنا ہشام بن ابی رقبہ رضی اللہ عنہ سے روایت ہے کہ ابوالدرداء رضی اللہ عنہ اور ابن عباس رضی اللہ عنہما نے فرمایا ہے: اللہ تعالیٰ کا اسمِ اعظم ” رَبِّ رَبِّ “ ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1881]

سیدنا ابوامامہ رضی اللہ عنہ سے مروی ہے کہ نبی اکرم صلی اللہ علیہ وسلم نے فرمایا: اللہ تعالیٰ کا اسمِ اعظم قرآن پاک کی تین صورتوں میں ہے: (1) سورۃ البقرہ۔ (2) سورۃ آل عمران۔ (3) سورۃ طہٰ۔ قاسم فرماتے ہیں: میں نے اس کو ڈھونڈا تو وہ ” الحی القیوم “ ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1882]

سیدنا سعد بن ابی وقاص رضی اللہ عنہ فرماتے ہیں: رسول اللہ صلی اللہ علیہ وسلم نے فرمایا: سیدنا یونس علیہ السلام نے مچھلی کے پیٹ میں جو دعا مانگی تھی وہ یہ ہے:” لَا اِلٰہَ اِلَّا اَنْتَ سُبْحَانَکَ، اِنِّیْ کُنْتُ مِنَ الظَّالِمِیْن “ (آپ نے فرمایا): مسلمان کسی بھی معاملے میں ان لفظوں کے ساتھ دعا مانگے تو اللہ تعالیٰ اس کو قبول کرتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا، اور یہ حدیث فریابی کے واسطے سے سفیان ثوری کے ذریعے یونس بن اسحاق سے بھی اسی طرح منقول ہے۔ (امام حاکم فرماتے ہیں) کہ یہ راوی کی غلطی ہے۔ (جیسا کہ درج ذیل ہے) [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1883]

سیدنا سعد بن ابی وقاص رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا: سیدنا یونس علیہ السلام نے مچھلی کے پیٹ میں یہ دعا مانگی تھی:” لَا اِلٰہَ اِلَّا اَنْتَ سُبْحَانَکَ اِنِّیْ کُنْتُ مِنَ الظَّالِمِیْن “ مسلمان کوئی بھی دعا ان الفاظ میں مانگے تو اس کی دعا قبول کی جاتی ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1884]

سیدنا ابراہیم بن محمد بن سعد رضی اللہ عنہ اپنے والد سے وہ ان کے دادا سے روایت کرتے ہیں کہ ہم نبی اکرم صلی اللہ علیہ وسلم کے ہمراہ موجود تھے۔ آپ صلی اللہ علیہ وسلم نے فرمایا: کیا میں تمہیں ایسی چیز کی خبر نہ دوں کہ اگر تم کسی دنیاوی آزمائش میں مبتلا ہو اور وہ دعا مانگو تو اللہ تعالیٰ تمہاری آزمائش ختم فرما دے گا۔ آپ صلی اللہ علیہ وسلم سے عرض کی گئی: جی ہاں۔ آپ صلی اللہ علیہ وسلم نے فرمایا: سیدنا یونس علیہ السلام کی دعا:” لَا اِلٰہَ اِلَّا اَنْتَ سُبْحَانَکَ، اِنِّیْ کُنْتُ مِنَ الظَّالِمِیْن “ ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1885]

سیدنا سعد بن مالک رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا: کیا میں تمہیں اللہ تعالیٰ کے اس اسمِ اعظم کے بارے میں رہنمائی نہ کروں کہ اس کے ساتھ جب دعا مانگی جائے تو قبول کی جاتی ہے، جب اس کے ساتھ سوال کیا جائے تو پورا کیا جاتا ہے۔ یہ وہ دعا ہے جو سیدنا یونس علیہ السلام نے مانگی تھی، جب انہوں نے اللہ تعالیٰ سے اندھیریوں میں تین مرتبہ یہ دعا مانگی تھی:” لَا اِلٰہَ اِلَّا اَنْتَ سُبْحَانَکَ، اِنِّیْ کُنْتُ مِنَ الظَّالِمِیْن “ ایک شخص نے عرض کی: یا رسول اللہ صلی اللہ علیہ وسلم کیا یہ سیدنا یونس علیہ السلام کے ساتھ خاص ہے یا تمام مؤمنوں کے لیے ہے؟ تو رسول اللہ صلی اللہ علیہ وسلم نے فرمایا: کیا تم نے اللہ تعالیٰ کا یہ فرمان نہیں سُنا: ” وَنَجَّیْنَاہُ مِنَ الْغَمِّ، وَکَذَلِکَ نُنْجِی الْمُؤْمِنِیْن “ رسول اللہ صلی اللہ علیہ وسلم نے فرمایا: کوئی شخص بیماری کی حالت میں چالیس مرتبہ یہ دعا مانگے اور اسی بیماری میں اس کا انتقال ہو جائے تو اس کو شہید کے برابر اجر دیا جاتا ہے اور اگر اس بیماری سے شفایاب ہو جائے تو اس کے تمام گناہوں کو بخش دیا جاتا ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1886]

سیدنا ابوامامہ رضی اللہ عنہ سے منقول ہے کہ نبی اکرم صلی اللہ علیہ وسلم نے ارشاد فرمایا: اللہ تعالیٰ کا اسمِ اعظم قرآن پاک کی تین آیتوں میں ہے: (1) سورۃ بقرہ۔ (2) سورۂ آل عمران۔ (3) سورۂ طہٰ۔ سیدنا ابوامامہ رضی اللہ عنہ فرماتے ہیں: میں نے تحقیق کی تو سورۂ بقرہ میں آیۃ الکرسی پائی جس میں ” اَللہُ لَآ اِٰلہَ اِلَّا ھُوَ الْحَیُّ الْقَیُّوْمُ “ ہے۔ اور آلِ عمران میں ” الم اَللہُ لَآ اِٰلہَ اِلَّا ھُوَ الْحَیُّ الْقَیُّوْمُ “ ہے۔ سورۂ طہٰ میں ” وَعَنَتِ الْوُجُوہُ لِلْحَیِّ الْقَیُّوْم “ ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1887]

سیدنا عمرو بن ابی سلمہ رضی اللہ عنہ سے مروی ہے کہ ابن ازبر عبداللہ بن العلاء نے فرمایا: میں نے قاسم ابوعبدالرحمن کو یہ فرماتے سنا ہے کہ میں نے ابوامامہ کو نبی اکرم صلی اللہ علیہ وسلم کا یہ ارشاد بیان کرتے سنا ہے کہ اللہ تعالیٰ کا اسمِ اعظم قرآن پاک کی تین سورتوں میں ہے۔ ان کو عیسیٰ بن موسیٰ نے کہا: اے ابوزبر! میں نے بھی یہ حدیث سُنی ہے۔ میں نے غیلان بن انس کو یہ فرماتے ہوئے سنا ہے کہ انہوں نے قاسم ابوعبدالرحمن کو ابوامامہ کے حوالے سے نبی اکرم صلی اللہ علیہ وسلم کا یہ ارشاد بیان کرتے سنا ہے کہ اللہ تعالیٰ کا اسمِ اعظم قرآن کریم کی تین سورتوں میں ہے پھر اس کے بعد عمرو بن ابی سلمہ کی طرح حدیث بیان کی۔ ٭٭ یہ حدیث ولید بن مسلم کی حدیث کو معلل نہیں کرتی۔ کیونکہ ولید بن مسلم اپنے شہر کی احادیث کو دوسروں سے زیادہ یاد رکھنے والے محفوظ رکھنے والے اور زیادہ پہچاننے والے ہیں۔ لیکن امام بخاری رحمۃ اللہ علیہ اور امام مسلم رحمۃ اللہ علیہ نے قاسم ابوعبدالرحمن کی روایات نقل کی ہیں۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1888]