سیدنا براء بن عازب رضی اللہ عنہ فرماتے ہیں کہ: رسول اللہ صلی اللہ علیہ وسلم کے زمانے میں میرا اونٹ گم ہو گیا، میں اس کو ڈھونڈتا پھر رہا تھا اور مختلف گھروں میں چکر لگا رہا تھا تو میں نے کچھ سواروں کو دیکھا کہ وہ آئے اور گھوم پھر کر انہوں نے ایک شخص کو گرفتار کیا، انہوں نے اس سے کوئی بات نہیں کی اور اس کو قتل کر ڈالا، جب وہ چلے گئے تو میں نے لوگوں سے اس کے متعلق دریافت کیا تو لوگوں نے مجھے بتایا کہ اس نے اپنے باپ کی بیوی کے ساتھ شادی کی تھی۔ [المستدرك على الصحيحين/كتاب النكاح/حدیث: 2813]

سیدنا سالم رضی اللہ عنہ اپنے والد کا بیان نقل کرتے ہیں: غیلان بن سلمہ ثقفی مسلمان ہوئے تو ان کے نکاح میں دس عورتیں تھیں، نبی اکرم صلی اللہ علیہ وسلم نے ان کو حکم دیا کہ ان میں سے چار کا انتخاب کر لے (اور باقی کو چھوڑ دے)۔ ٭٭ اس حدیث کو اسی طرح سعید بن یزید بن زریع کے شاگردوں، اسماعیل بن علیہ، غندر اور اہلِ بصرہ کے حافظہ اَئمہ نے بھی روایت کی ہے۔ امام مسلم بن حجاج رحمۃ اللہ علیہ نے یہ فیصلہ کیا ہے کہ اس حدیث میں معمر کو بصرہ کی وجہ وہم ہے۔ اگر اس حدیث کو بصریوں کے علاوہ کوئی دوسرا ثقہ راوی روایت کرتا تو ہم اس کی صحت کا حکم لگاتے۔ پھر سفیان الثوری، عبدالرحمن بن محمد المحاربی اور عیسیٰ بن یونس یہ تینوں کوفی ہیں، ان سب نے محمد کے ذریعے زہری کے واسطے سے سالم کے حوالے سے ان کے والد کا یہ بیان نقل کیا ہے کہ جب غیلان بن سلمہ مسلمان ہوئے، تو اس کے نکاح میں دس عورتیں تھیں رسول اللہ صلی اللہ علیہ وسلم نے ان کو حکم دیا کہ ان میں سے چار کا انتخاب کر لے (اور باقی کو چھوڑ دے)۔ محاربی کی حدیث: [المستدرك على الصحيحين/كتاب النكاح/حدیث: 2814]

محاربی کی سند کے ہمراہ مروی ہے کہ سیدنا عبداللہ رضی اللہ عنہ فرماتے ہیں: غیلان بن سلمہ جب مسلمان ہوئے تو جاہلیت میں ان کے نکاح میں دس عورتیں تھیں، وہ سب بھی ان کے ساتھ ہی مسلمان ہو گئیں تھیں۔ رسول اللہ صلی اللہ علیہ وسلم نے ان کو فرمایا: ان میں سے صرف چار کا انتخاب کر لو (باقیوں کو چھوڑ دو)۔ عیسیٰ کی حدیث: [المستدرك على الصحيحين/كتاب النكاح/حدیث: 2815]

سیدنا عبداللہ بن عمر رضی اللہ عنہما سے روایت ہے کہ غیلان بن سلمہ رضی اللہ عنہ جب اسلام لائے تو (زمانہ جاہلیت کی) ان کی دس بیویاں تھیں جو ان کے ساتھ ہی اسلام لے آئیں۔ رسول اللہ صلی اللہ علیہ وسلم نے ان سے فرمایا: ”ان میں سے (اپنی پسند کی) چار منتخب کر لو (اور باقی کو چھوڑ دو)“۔ اور جہاں تک عیسیٰ کی حدیث کا تعلق ہے: [المستدرك على الصحيحين/كتاب النكاح/حدیث: 2816]

عیسیٰ بن یونس کی سند کے ہمراہ مروی ہے کہ سیدنا عبداللہ رضی اللہ عنہ فرماتے ہیں: غیلان بن سلمہ الثقفی اسلام لائے تو اس وقت ان کے نکاح میں دس عورتیں تھیں، رسول اللہ صلی اللہ علیہ وسلم نے ان کو حکم دیا کہ ان میں سے چار کا انتخاب کر لے اور باقی تمام کو چھوڑ دے۔ ٭٭ یونہی خراسان کے ائمہ کی بھی معمر سے روایت موجود ہے۔ (جو کہ درج ذیل ہے) [المستدرك على الصحيحين/كتاب النكاح/حدیث: 2817]

سیدنا عبداللہ رضی اللہ عنہ فرماتے ہیں کہ غیلان بن سلمہ ثقفی اسلام لائے تو اس وقت ان کی دس بیویاں تھیں، رسول اللہ صلی اللہ علیہ وسلم نے ان کو حکم دیا کہ ان میں سے چار رکھ لیں۔ ٭٭ خراسانی ائمہ بھی اس حدیث کو سیدنا معمر سے اسی طرح روایت کرتے ہیں۔ [المستدرك على الصحيحين/كتاب النكاح/حدیث: 2818]

مذکورہ سند کے ہمراہ بھی مروی ہے کہ سیدنا عبداللہ رضی اللہ عنہ فرماتے ہیں کہ غیلان بن سلمہ ثقفی اسلام لائے تو اس وقت ان کے پاس دس عورتیں تھیں۔ رسول اللہ صلی اللہ علیہ وسلم نے ان کو حکم دیا کہ ان میں سے چار کا انتخاب کر لے اور باقی تمام کو الگ کر دے۔ ٭٭ میں نے اپنی کوششوں اور محنتوں کا جو نتیجہ اخذ کیا ہے، وہ یہ ہے کہ معمر بن راشد نے یہ حدیث دو سندوں کے ہمراہ روایت کی ہے۔ ایک سند میں وہ ” ارسال “ کرتے ہیں اور دوسری میں ” وصل “۔ اس کی دلیل یہ ہے کہ اہلِ بصرہ میں سے جن راویوں نے اس حدیث کو معمر سے موصولاً بیان کیا انہوں نے ارسال بھی کیا ہے اور ارسال سے وصل بہتر ہوتا ہے کیونکہ ثقہ کی جانب سے زیادتی مقبول ہوتی ہے۔ (واللہ اعلم بالصواب)۔ [المستدرك على الصحيحين/كتاب النكاح/حدیث: 2819]

سیدنا حبیب المعلم رضی اللہ عنہ فرماتے ہیں: ایک شخص اہلِ کوفہ سے عمرو بن شعیب کے پاس آیا اور کہنے لگا: کیا آپ کو حسن کی اس بات سے تعجب نہیں ہوتا کہ ” سزایافتہ زانی کے ساتھ اسی جیسی سزایافتہ زانیہ ہی کا نکاح کیا جائے “۔ عمرو بولے: اس میں تعجب کی بات کیا ہے؟ سعیدالمقبری نے ہمیں ابوہریرہ رضی اللہ عنہ کے حوالے سے نبی اکرم صلی اللہ علیہ وسلم کا یہی فرمان بیان کیا ہے۔ اور عبداللہ بن عمرو رضی اللہ عنہ تو اس کا اعلان کروایا کرتے تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب النكاح/حدیث: 2820]

سیدنا عبداللہ بن عمرو رضی اللہ عنہ روایت کرتے ہیں، ایک مسلمان شخص نے نبی اکرم صلی اللہ علیہ وسلم سے ایک پیشہ ور طوائفہ کے ساتھ شادی کرنے کی اجازت مانگی، نبی اکرم صلی اللہ علیہ وسلم نے پڑھا: (اَلزَّانِیْ لَا یَنْکِحُ اِلاَّ زَانِیَۃً اَوْ مُشْرِکَۃً) (النور: 3) ” بدکار مرد نکاح نہ کرے مگر بدکار عورت یا شرک والی سے “۔۔ پھر یہ آیت نازل ہوئی: (الزَّانِیَۃُ لَا یَنْکِحُھَآ اِلَّا زَانٍ اَوْ مُشْرِکٌ) (النور: 3) ” بدکار عورت سے نکاح نہ کرے مگر بدکار مرد یا مشرک “۔۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب النكاح/حدیث: 2821]

سیدنا ابن عباس رضی اللہ عنہما فرماتے ہیں کہ (اَلزَّانِیْ لَا یَنْکِحُ اِلاَّ زَانِیَۃً اَوْ مُشْرِکَۃً) میں نکاح مراد نہیں ہے بلکہ ” جماع “ مراد ہے۔ (یعنی جو اس سے جماع کرے گا وہ زانی یا مشرک ہی ہو گا)۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب النكاح/حدیث: 2822]