سیدنا معدان بن ابوطلحہ یعمری فرماتے ہیں: سیدنا عمر بن خطاب رضی اللہ عنہ نے منبر پر (خطبہ دیتے ہوئے) ارشاد فرمایا: میں نے خواب میں دیکھا ہے جیسا کہ کسی مرغے نے مجھے تین مرتبہ چونچ ماری ہے۔ میں اس کی تعبیر یہ سمجھا ہوں کہ اب میرا آخری وقت آ چکا ہے۔ اور میں خلافت کا معاملہ ان چھ صحابہ رضی اللہ عنہم کے ذمہ چھوڑتا ہوں جن سے رسول اللہ صلی اللہ علیہ وسلم راضی حالت میں اس دنیا سے تشریف لے گئے تھے (ان کے نام یہ ہیں) سیدنا عثمان رضی اللہ عنہ، سیدنا علی رضی اللہ عنہ، سیدنا طلحہ رضی اللہ عنہ، سیدنا زبیر رضی اللہ عنہ، سیدنا عبدالرحمن بن عوف رضی اللہ عنہ، سیدنا سعد بن ابی وقاص رضی اللہ عنہ۔ ان میں سے جس کو بھی خلیفہ بنا لیا جائے وہی خلافت کا اہل ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4561]

سیدنا ابورافع رضی اللہ عنہ فرماتے ہیں: ابولؤلؤۃ سیدنا مغیرہ بن شعبہ رضی اللہ عنہ کا غلام تھا۔ یہ چکیاں بنانے کا کاریگر تھا۔ سیدنا مغیرہ اس سے روزانہ چار درہم اجرت پر کام کروایا کرتے تھے۔ ابولولوۃ سیدنا عمر رضی اللہ عنہ سے ملا اور بولا: اے امیرالمومنین! مغیرہ نے مجھ پر (کام کا) بہت بوجھ ڈال رکھا ہے۔ اس کو فرمائیں کہ وہ مجھ پر کچھ تخفیف کر دے۔ سیدنا عمر رضی اللہ عنہ نے اس سے فرمایا: خدا کا خوف کر اور اپنے آقا کی فرمانبرداری کر۔ جبکہ سیدنا عمر رضی اللہ عنہ کی نیت یہ تھی کہ مغیرہ سے مل کر تخفیف کرنے کو کہہ دیں گے۔ لیکن ابولؤلؤۃ کو اس بات پر غصہ آ گیا اور اس نے (اسی دن) سیدنا عمر رضی اللہ عنہ کو شہید کرنے کا ارادہ کر لیا تھا۔ اس نے دو نوکوں والا ایک خنجر بنایا۔ اس کو خوب تیز کیا اور اسے زہر میں ڈال کر رکھ دیا۔ (سیدنا ابورافع) کہتے ہیں: (ایک دن نماز کے لئے) تکبیر کہی گئی، اور سیدنا عمر رضی اللہ عنہ کی یہ عادت تھی کہ جب اقامت ہو جاتی تو نماز شروع کرنے سے پہلے صفیں درست کرنے کو کہا کرتے تھے۔ ابولؤلؤۃ نماز فجر میں آیا اور (صف اول میں) سیدنا عمر رضی اللہ عنہ کے بالکل قریب کھڑا ہو گیا۔ جب اقامت ہو گئی تو (حسب عادت) سیدنا عمر رضی اللہ عنہ نے صفیں درست کرنے کی ہدایات دیں، پھر تکبیر کہی۔ تو اس نے آپ پر حملہ کر دیا۔ آپ کے کندھے، آپ کے پہلو اور دیگر مقامات پر خنجر کے پے درپے وار کئے۔ سیدنا عمر بن خطاب رضی اللہ عنہ گر پڑے، پھر اس نے مزید 13 آدمیوں پر حملہ کیا۔ ان میں سے 7 شدید زخمی ہوئے، جبکہ 6 شہید ہو گئے۔ سیدنا عمر رضی اللہ عنہ کو اٹھا کر (آپ کے گھر) لایا گیا، لوگوں میں پریشانی کی لہر دوڑ گئی حتی کہ سورج بالکل طلوع ہونے کے قریب تھا کہ سیدنا عبدالرحمن بن عوف رضی اللہ عنہ نے آواز دی: اے لوگو! نماز پڑھو، نماز پڑھو، تو لوگ جلدی سے نماز کی طرف آ گئے، سیدنا عبدالرحمن رضی اللہ عنہ نے لوگوں کو نماز پڑھائی، آپ نے نماز میں سب سے مختصر سورتیں پڑھیں، جب نماز سے فارغ ہوئے تو سب لوگ سیدنا عمر رضی اللہ عنہ کی خدمت میں آ گئے۔ (سیدنا ابورافع) فرماتے ہیں: آپ کے زخم کی گہرائی کا اندازہ لگانے کے لئے پانی منگوایا گیا، آپ کو نبیذ پیش کیا گیا، آپ نے وہ نبیذ پیا تو وہ نکل گیا۔ لیکن یہ اندازہ نہ ہو سکا کہ یہ نبیذ ہے یا خون، پھر دودھ منگوایا گیا، آپ کو دودھ پیش کیا گیا۔ آپ نے پیا تو زخم کے راستے سے وہ بھی نکل گیا۔ لوگ (تسلی دیتے ہوئے) کہنے لگے: اے امیرالمومنین! آپ کو کوئی نقصان نہیں ہو گا۔ آپ نے فرمایا: اگر قتل کوئی نقصان کی چیز ہے تو (جان لو کہ) میں قتل کر دیا گیا ہوں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4562]

سیدنا سعید بن مسیب رضی اللہ عنہ فرماتے ہیں: سیدنا عمر بن خطاب رضی اللہ عنہ اپنے آخری حج کے موقعہ پر منیٰ سے نکلے تو اپنی اونٹنی کو بطحاء میں بٹھایا، مٹی جمع کر کے اس کی ڈھیری بنائی، اس کے اوپر چادر بچھا کر لیٹ گئے اور اپنے ہاتھ آسمان کی طرف بلند کر کے بولے: اے اللہ! میں عمر رسیدہ ہو گیا ہوں، میں کمزور ہو گیا ہوں۔ میری عقل سست ہو چکی ہے۔ تو مجھے اپنے پاس بلا لے تاکہ میں نہ کچھ ضائع کروں اور نہ حد سے بڑھوں۔ پھر آپ ذی الحجہ میں آئے اور خطبہ دیتے ہوئے ارشاد فرمایا: اے لوگو! میں نے تمہارے لئے سنتوں کو سنت اور فرائض کو فرائض کے طور پر نافذ کیا۔ اور تمہیں ایک واضح راستہ پر چلا کر چھوڑا ہے۔ پھر آپ نے اپنا ایک ہاتھ دوسرے پر مارتے ہوئے فرمایا: مگر یہ کہ تم (اپنی مرضی سے) دائیں یا بائیں پھر جاؤ، (اس میں میرا کوئی قصور نہیں ہے) جب ذی الحجہ گزر گیا تو سیدنا عمر رضی اللہ عنہ کو شہید کر دیا گیا۔ سیدنا سعید بن مسیب رضی اللہ عنہ فرماتے ہیں: ابولؤلؤۃ جس سے سیدنا عمر رضی اللہ عنہ کو شہید کیا تھا، اس نے آپ کے ساتھ ساتھ مزید 12 آدمیوں پر حملہ کیا تھا جن میں سے 6 شہید ہو گئے تھے اور 6 زخمی تھے (لیکن فوت ہونے سے بچ گئے تھے) اس (ابولؤلؤۃ) کے پاس دو دھاری والی چھری تھی، پھر اس نے اسی کے ساتھ خودکشی کر لی تھی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4563]

سیدنا عبداللہ بن عمر رضی اللہ عنہما فرماتے ہیں: قاتلانہ حملہ ہونے کے بعد سیدنا عمر رضی اللہ عنہ تین دن تک زندہ رہے پھر آپ کا انتقال ہو گیا۔ تو آپ کو غسل دیا گیا اور کفن دیا گیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4564]

سیدنا عبداللہ بن عباس رضی اللہ عنہما فرماتے ہیں: جب سیدنا عمر رضی اللہ عنہ زخمی تھے تو میں ان کی خدمت میں حاضر ہوا، میں نے کہا: اے امیرالمومنین! آپ کو جنت کی خوشخبری ہو، آپ اس وقت اسلام لائے جب لوگ کفر میں مبتلا تھے، آپ نے اس وقت رسول اللہ صلی اللہ علیہ وسلم کے ساتھ تعاون کیا جب لوگ آپ کو (معاذاللہ) ذلیل کرنے کے درپے تھے۔ اور رسول اللہ صلی اللہ علیہ وسلم نے جب اس دنیا سے پردہ کیا تو آپ پر راضی تھے۔ اور آپ کی خلافت میں دو آدمیوں میں بھی اختلاف نہیں ہوا، اور آپ کا قتل بھی شہادت ہے۔ سیدنا عمر رضی اللہ عنہ نے فرمایا: یہی باتیں دوبارہ بولو! میں ساری گفتگو دہرائی، پھر آپ بولے: اس ذات کی قسم! جس کے سوا کوئی معبود نہیں ہے اگر روئے زمین پر موجود ہر سفید اور زرد میری ملکیت میں ہوتا تو میں اس ہیبت پر فدیہ دے دیتا جس کی اطلاع دی گئی ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4565]

سیدنا عبداللہ بن عمر رضی اللہ عنہما فرماتے ہیں: سیدنا عمر رضی اللہ عنہ کی نماز جنازہ مسجد میں ادا کی گئی اور سیدنا صہیب رضی اللہ عنہ نے آپ کی نمازہ جنازہ پڑھائی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4566]

ہشام بن عروہ اپنے والد سے روایت کرتے ہیں: جب سیدنا عمر رضی اللہ عنہ کو شہید کیا گیا تو سیدنا عثمان رضی اللہ عنہ اور سیدنا علی رضی اللہ عنہ ان کا جنازہ پڑھانے کے لئے آگے بڑھے تو سیدنا صہیب رضی اللہ عنہ نے ان سے کہا: آپ مجھے موقع دیجئے، میں سیدنا عمر رضی اللہ عنہ کا جنازہ پڑھانے کا تم سے زیادہ حق رکھتا ہوں کیونکہ میں ہی تمہیں فرض نمازیں بھی پڑھاتا ہوں، چنانچہ سیدنا صہیب رضی اللہ عنہ نے آپ کی نماز جنازہ پڑھائی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4567]

واقدی روایت کرتے ہیں: سیدنا عمر رضی اللہ عنہ نے دس حج مسلسل کئے، ان میں سے ایک حج سیدنا ابوبکر رضی اللہ عنہ کی خلافت میں کیا اور باقی 9 حج اپنی خلافت میں کئے، اور سیدہ عائشہ رضی اللہ عنہا کے حجرہ میں سیدنا ابوبکر رضی اللہ عنہ کے پہلو میں دفن ہوئے۔ آپ کی خلافت کی مدت دس سال 5 مہینے اور 29 دن تھی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4568]

محمد بن عمرہ کہتے ہیں: ابوسلمہ اور یحیی بن عبدالرحمن بن حاطب اور ہمارے دیگر اساتذہ بیان کرتے ہیں کہ جب سیدنا عمر رضی اللہ عنہ زخمی ہوئے تو آپ نے (اپنے صاحبزادے) عبداللہ سے فرمایا: ام المومنین سیدہ عائشہ رضی اللہ عنہا کے پاس جا کر میرا سلام عرض کرو اور کہو: عمر کی درخواست ہے کہ اگر آپ کو برا نہ لگے اور آپ کو تکلیف نہ ہو تو میں اپنے دونوں ساتھیوں کے ہمراہ دفن ہونا چاہتا ہوں اور اگر آپ کو تکلیف ہو یا آپ کو برا لگے تو خدا کی قسم! اس بقیع پاک میں ایسے ایسے اصحاب رسول و امہات المومنین مدفون ہیں جو عمر سے بدر جہا بہترتھے (تو کوئی بات نہیں میں بھی وہیں مدفون ہو جاؤں گا) سیدنا عبداللہ ام المومنین کے پاس آئے، تو ام المومنین رضی اللہ عنہا نے فرمایا: نہ مجھے کوئی نقصان ہے اور نہ مجھے برا لگے گا۔ تو سیدنا عمر رضی اللہ عنہ نے فرمایا: ٹھیک ہے مجھے ان دونوں (حضرات) کے ساتھ دفن کرنا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4569]

قاسم بن محمد بیان کرتے ہیں: میں نے سیدہ عائشہ رضی اللہ عنہا کے حجرہ کے اندر روضہ اطہر میں رسول اللہ صلی اللہ علیہ وسلم ، سیدنا ابوبکر رضی اللہ عنہ اور سیدنا عمر رضی اللہ عنہ کی قبریں دیکھی ہیں۔ میں نے ان پر سرخ کنکریاں پڑی ہوئی دیکھی ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4570]