سیدنا انس رضی اللہ عنہ فرماتے ہیں: سیدنا عمر رضی اللہ عنہ کا وصال مبارک 63 برس کی عمر میں ہوا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4571]

سیدنا عبداللہ بن مسعود رضی اللہ عنہ فرماتے ہیں: سیدنا عمر رضی اللہ عنہ ایک مظبوط قلعہ تھے جس میں اسلام داخل تو ہو سکتا تھا لیکن نکل نہیں سکتا تھا۔ جب سیدنا عمر رضی اللہ عنہ کو شہید کیا گیا تو یہ قلعہ ٹوٹ گیا تو اسلام اس سے نکلنے لگ گیا۔ اور اس میں داخل نہ ہوتا تھا۔ جب بھی صالحین کا ذکر ہوتا ہے تو سیدنا عمر رضی اللہ عنہ ان میں سرفہرست ہوتے ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4572]

سیدنا جابر بن عبداللہ رضی اللہ عنہ فرماتے ہیں: سیدنا علی رضی اللہ عنہ، سیدنا عمر رضی اللہ عنہ کے پاس آئے، اس وقت سیدنا عمر رضی اللہ عنہ کفن میں تھے، آپ نے کہا: اے عمر رضی اللہ عنہ! تم پر اللہ تعالیٰ کی رحمت ہو، پھر فرمایا: اس کفن میں لپٹے ہوئے شخص سے بڑھ کر میں کسی کے بارے میں یہ خواہش نہیں رکھتا ہوں کہ میں اللہ سے اس چیز کے ہمراہ ملاقات کروں جو اس کے نامہ اعمال میں ہے۔ ٭٭ امام حاکم کہتے ہیں: سیدنا ابوبکر رضی اللہ عنہ کی وفات کے بعد مشاورت کے متعلق صحیح احادیث سقیفہ بنی ساعدہ کی اخبار کے ساتھ موصول ہیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4573]

مالک بن دینار فرماتے ہیں: جب سیدنا عمر رضی اللہ عنہ کو شہید کیا گیا تو جبل تبالہ کی جانب سے یہ آواز سنائی دی۔ حاضر ہے اسلام کی خدمت میں جو کوئی رونے والا ہے، بے شک قریب ہے میری ہلاکت اور زمانہ قریب آ گیا ہے۔ اور دنیا پیچھے پلٹ گئی ہے اور اس کی بھلائی بھی لوٹ گئی ہے اور وہ ملال میں ہے جو آخرت پر یقین رکھتا ہے۔ لوگوں نے دیکھا تو کوئی نظر نہ آیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4574]

سیدنا عاتکہ بنت زید بن عمرو بن نفیل نے سیدنا عمر رضی اللہ عنہ کا مرثیہ پڑھتے ہوئے کہا ہے: اے آنکھ! عبرت اور سختی کے ساتھ رو اور برگزیدہ امام پر رونے میں دیر نہ کر۔ مجھے اس شہسوار کی موت نے پریشانی میں مبتلا کر دیا ہے جو لڑائی اور جنگ کے موقعہ پر دوسروں کو تعلیم دیتا ہے۔ وہ دین کی عصمت ہے اور زمانے کا مددگار ہے اور غمزدوں اور پریشان حالوں کا مددگار ہے۔ مصیبت زدوں اور غم کے ماروں سے کہہ دو کہ مر جاؤ، کیونکہ موت نے ہمیں پریشانی کے جام پلائے ہیں۔ اور عاتکہ نے یہ بھی کہا ہے: مجھے فیروز نے پریشان کر دیا ہے۔ یہ غریب پر مہربان ہے اور مالداروں پر سخت ہے، ثقہ بھائی ہے اور مصیبت زدوں کی فریاد کو پہنچنے والا ہے۔ یہ جب کوئی بات کہہ دیتا ہے تو اس کا عمل اس کے قول کی تکذیب نہیں کرتا، یہ ماتھے پر شکن ڈالے بغیر نیکیوں کی طرف جلدی کرنے والا ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4575]

سیدنا عبداللہ بن عمر رضی اللہ عنہما فرماتے ہیں: سیدنا عمر رضی اللہ عنہ نے اصحاب شوریٰ سے فرمایا: اللہ ان پر رحمت کرے، اگر یہ (اصیلع) کو امیر بنا لیں، وہ ہمیشہ حق بات کرے گا اگرچہ اس کی گردن پر تلوار کیوں نہ رکھی ہوئی ہو، ابن عمر رضی اللہ عنہما فرماتے ہیں: میں نے عرض کی: آپ جب اس کے بارے میں اتنا کچھ جانتے ہیں تو ان کو خلیفہ نامزد کیوں نہیں کر دیتے؟ آپ نے فرمایا: اگر میں خلیفہ نامزد کروں تو (اس میں کوئی حرج بھی نہیں ہے کیونکہ) اس نے بھی تو خلیفہ نامزد کر ہی دیا تھا جو مجھ سے بہتر تھا اور اگر میں خلیفہ نامزد نہ کروں (تب بھی کوئی مضائقہ نہیں ہے کیونکہ) اس نے بھی تو خلیفہ نامزد نہیں کیا تھا جو مجھ سے بہتر تھا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4576]

سیدنا قیس بن عباد رضی اللہ عنہ فرماتے ہیں: میں نے جنگ جمل کے دن سیدنا علی رضی اللہ عنہ کو یہ کہتے ہوئے سنا ہے ” اے اللہ! میں تیری بارگاہ میں سیدنا عثمان رضی اللہ عنہ کے قتل سے براءت کا اظہار کرتا ہوں، جس دن سیدنا عثمان کو شہید کیا گیا، اس دن میری عقل کھو گئی تھی اور یہ عمل مجھے انتہائی ناگوار گزرا تھا، لوگ میرے پاس بیعت کے لئے آئے تھے لیکن میں نے یہ کہہ کر بیعت لینے سے انکار کر دیا ” خدا کی قسم! مجھے اللہ تعالیٰ کی بارگاہ میں ایسی قوم سے بیعت لینے سے حیاء آتی ہے جنہوں نے ایسے آدمی کو شہید کر ڈالا ہے جن کے بارے میں رسول اللہ صلی اللہ علیہ وسلم فرمایا کرتے تھے: کیا میں اس سے حیاء نہ کروں جس سے فرشتے بھی حیاء کرتے ہیں۔ اور میں ایسے حالات میں بھی بیعت لینے سے اللہ سے حیاء کرتا ہوں کہ سیدنا عثمان رضی اللہ عنہ کو شہید کر دیا گیا ہے اور ابھی ان کی تدفین بھی نہیں ہوئی ہے۔ وہ لوگ واپس چلے گئے، جب سیدنا عثمان رضی اللہ عنہ کی تدفین ہو چکی تو لوگ دوبارہ میرے پاس آئے اور بیعت لینے کا مطالبہ کیا۔ میں نے کہا: سیدنا عثمان رضی اللہ عنہ کے متعلق جو اقدام کیا گیا ہے، میں اس سلسلہ میں بہت ڈر رہا ہوں لیکن پھر عزیمت آ گئی تو میں نے ان سے بیعت لے لی۔ لوگوں نے مجھے ” یا امیرالمومنین “ کہہ کر مخاطب کیا تو لگتا تھا کہ میرا دل پھٹ جائے گا۔ اور میں نے کہا: اے اللہ! تو سیدنا عثمان رضی اللہ عنہ کے متعلق مجھ سے مؤاخذہ کر لے حتی کہ تو راضی ہو جائے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4577]

ابن شہاب نے سیدنا عثمان رضی اللہ عنہ کا نسب یوں بیان کیا ہے۔ عثمان بن عفان بن ابی العاص بن امیہ بن عبدشمس بن عبد مناف بن قصی بن کلاب “ اور سیدنا عثمان کی والدہ کا نام ” اروی بنت کریز “ تھا اور ” ام اروی “ ہی ام حکیم بیضاء ہیں جو رسول اللہ صلی اللہ علیہ وسلم کی پھوپھی ہیں۔ سیدنا عثمان رضی اللہ عنہ کی کنیت میں اختلاف ہے، بعض کے نزدیک ابوعبداللہ ہے اور بعض کے نزدیک ابوعمرو ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4578]

سیدنا ابان بن عثمان (ایک حدیث بیان کرتے ہوئے) فرماتے ہیں: سمعت ابا عبداللہ عثمان بن عفان (میں نے ” ابوعبداللہ عثمان بن عفان کو فرماتے سنا ہے) جبکہ ابوبکر بن ابی شیبہ کہتے ہیں کہ سیدنا عثمان بن عفان رضی اللہ عنہ کی کنیت ” ابوعمرو “ تھی اور یہ بھی کہتے ہیں کہ ابوعبداللہ ذی الحجہ میں 35 ہجری کو شہید کئے گئے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4579]

عثمان بن سعید دارمی بیان کرتے ہیں کہ میں نے ابوبکر بن ابی شیبہ کو یہ کہتے ہوئے سنا: ”سیدنا عثمان بن عفان رضی اللہ عنہ کی کنیت ابو عمرو اور ابو عبداللہ ہے، آپ ذوالحجہ سن 35 ہجری میں شہید کیے گئے“۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 4579M]