قیس غفاری اپنے والد کا یہ بیان نقل کرتے ہیں کہ مغرب کے بعد ہم لوگ صفہ میں تھے کہ ہمارے پاس رسول اللہ صلی اللہ علیہ وسلم تشریف لائے، اور کچھ اصحاب صفہ کو کچھ صحابہ کرام رضی اللہ عنہم کے ہمراہ (کھانا کھانے کے لیے) بھیج دیا، ہم پانچ لوگ بچ گئے۔ آپ صلی اللہ علیہ وسلم نے ہمیں فرمایا: تم لوگ میرے ساتھ چلو، ہم آپ صلی اللہ علیہ وسلم کے ہمراہ چل دیئے، ہم ام المومنین سیدہ عائشہ رضی اللہ عنہا کے پاس گئے، یہ واقعہ پردے کے احکام نازل ہونے سے پہلے کا ہے۔ رسول اللہ صلی اللہ علیہ وسلم نے فرمایا: اے عائشہ (رضی اللہ عنہا) ہمیں کچھ کھلاؤ، ام المومنین سیدہ عائشہ رضی اللہ عنہا نے حشیشہ (مخصوص کھانا، جو آٹے کو پکا کر اس میں گوشت یا کھجوریں وغیرہ ڈال کر بنایا جاتا ہے) پیش کیا، آپ صلی اللہ علیہ وسلم نے پھر فرمایا: اے عائشہ (رضی اللہ عنہا) ہمیں کچھ کھلاؤ، ام المومنین رضی اللہ عنہا نے ایک کبوتر جتنا حیس (ایک قسم کا کھانا جو گھی ستو اور جو سے تیار کیا جاتا ہے) پیش کر دیا، حضور صلی اللہ علیہ وسلم نے فرمایا: اے عائشہ (رضی اللہ عنہا) ہمیں کچھ پلاؤ، ام المومنین نے ایک پیالے میں پانی پیش کیا، یہ پینے کے بعد۔ حضور صلی اللہ علیہ وسلم نے ہمیں فرمایا: اب تم سونا چاہو تو یہاں سو جاؤ، اور مسجد میں جانا چاہو تو وہاں جا کر سو جاؤ، راوی کہتے ہیں: ہم لوگ مسجد میں آ کر سو گئے، رات کے آخری حصے میں نبی اکرم صلی اللہ علیہ وسلم تشریف لائے، میں پیٹ کے بل الٹا سویا ہوا تھا، حضور صلی اللہ علیہ وسلم نے مجھے پاؤں کی ٹھوکر مار کر جگایا اور فرمایا: تم اس طرح کیوں سوئے ہوئے ہو؟ اس انداز میں سونا اللہ تعالیٰ کو پسند نہیں ہے۔ ٭٭ اس حدیث کی اسناد میں یحیی بن ابی کثیر پر اختلاف ہے۔ اور نتیجہ یہ ہے کہ قیس بن طخفہ غفاری درست ہیں۔ اور اس کی ایک شاہد حدیث بھی موجود ہے جس کو سیدنا ابوہریرہ رضی اللہ عنہ نے روایت کیا ہے۔ [المستدرك على الصحيحين/كتاب الأدب/حدیث: 7901]

سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم کا گزر ایک ایسے آدمی کے پاس سے ہوا جو کہ پیٹ کے بل سویا ہوا تھا، آپ صلی اللہ علیہ وسلم نے پاؤں کی ٹھوکر مار کر اس کو جگایا اور فرمایا: اس انداز میں لیٹنا اللہ تعالیٰ کو پسند نہیں ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كتاب الأدب/حدیث: 7902]

سیدنا ابوہریرہ رضی اللہ عنہ فرماتے ہیں: رسول اللہ صلی اللہ علیہ وسلم نے دھوپ اور چھاؤں کے درمیان میں بیٹھنے سے منع فرمایا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأدب/حدیث: 7903]

قیس بن ابی حازم اپنے والد کا یہ بیان نقل کرتے ہیں کہ نبی اکرم صلی اللہ علیہ وسلم نے مجھے دیکھا، میں دھوپ میں بیٹھا ہوا تھا۔ آپ صلی اللہ علیہ وسلم نے فرمایا: سائے میں چلے جاؤ، کیونکہ وہ برکت والا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأدب/حدیث: 7904]

قیس بن ابی حازم فرماتے ہیں کہ نبی اکرم صلی اللہ علیہ وسلم نے میرے والد محترم کو دیکھا، وہ دھوپ میں بیٹھے ہوئے تھے، آپ صلی اللہ علیہ وسلم نے فرمایا: چھاؤں میں ہو جاؤ، کیونکہ وہ برکت والی ہے۔ ٭٭ یہ حدیث صحیح الاسناد ہے اگرچہ شعبہ نے اس میں ارسال کیا ہے۔ کیونکہ منجاب بن حارث اور علی بن مسہر ثقہ راوی ہیں۔ [المستدرك على الصحيحين/كتاب الأدب/حدیث: 7905]

سیدنا سعید بن ابی الحسن فرماتے ہیں: ہم ایک گھر میں گواہی دینے کے لیے موجود تھے، سیدنا ابوبکرہ ہمارے پاس آئے، مجلس میں سے ایک آدمی ان کی جانب اٹھا، سیدنا ابوبکرہ نے کہا: رسول اللہ صلی اللہ علیہ وسلم نے ارشاد فرمایا: کوئی آدمی، دوسرے کو اٹھا کر اس کی جگہ خود نہ بیٹھے، اور اپنا ہاتھ اس کپڑے کے ساتھ صاف نہ کریں جو تمہارا نہیں ہے۔ ٭٭ یہ حدیث صحیح الاسناد ہے۔ امام بخاری رحمۃ اللہ علیہ اور امام مسلم رحمۃ اللہ علیہ نے قیام والی بات نقل کی ہے، اور کپڑے والی بات نقل نہیں کی۔ [المستدرك على الصحيحين/كتاب الأدب/حدیث: 7906]

عبداللہ بن بریدہ اپنے والد کا یہ بیان نقل کرتے ہیں کہ رسول اللہ صلی اللہ علیہ وسلم نے دو مجلسوں سے اور ملبوسات سے منع فرمایا۔ دو مجلسیں یہ ہیں۔ ٭ دھوپ اور چھاؤں کے درمیان بیٹھنا۔ ٭ ایک چادر میں یوں لپٹ کر بیٹھنا کہ اپنی شرمگاہ پر نظر پڑتی ہو۔ اور دو ملبوسات یہ ہیں۔ ٭ ایک کپڑے میں یوں نماز پڑھنا کہ کپڑا پہنا ہوا نہ ہو۔ ٭ قمیص یا کوئی چادر اوڑھے بغیر صرف شلوار پہن کر نماز پڑھنا۔ [المستدرك على الصحيحين/كتاب الأدب/حدیث: 7907]

ام المومنین سیدہ عائشہ رضی اللہ عنہا فرماتی ہیں: میں نے گفتگو، سمجھانے کے انداز اور گفتار میں، فاطمہ سے زیادہ کسی کی حضور صلی اللہ علیہ وسلم کے ساتھ مشابہت نہیں دیکھی، اٹھنا، بیٹھنا سب حضور صلی اللہ علیہ وسلم جیسا تھا۔ آپ فرماتی ہیں: جب سیدہ فاطمہ رضی اللہ عنہا نبی اکرم صلی اللہ علیہ وسلم کے پاس آتیں تو حضور صلی اللہ علیہ وسلم ان کے استقبال کے لیے اٹھ کر کھڑے ہو جاتے، ان کی پیشانی پر بوسہ دیتے اور ان کو اپنے ساتھ بٹھاتے۔ اور جب نبی اکرم صلی اللہ علیہ وسلم ان کے پاس تشریف لے جاتے، تو سیدہ فاطمہ رضی اللہ عنہا حضور صلی اللہ علیہ وسلم کے استقبال کے لیے کھڑی ہو جاتیں، حضور صلی اللہ علیہ وسلم کی پیشانی پر بوسہ دیتیں، اور حضور صلی اللہ علیہ وسلم کو اپنی جگہ پر بٹھاتیں۔ جب نبی اکرم صلی اللہ علیہ وسلم مرض الموت میں مبتلا ہوئے تو سیدہ کائنات سیدہ فاطمہ رضی اللہ عنہا رسول اللہ صلی اللہ علیہ وسلم کی خدمت میں حاضر ہوئیں، اور حضور صلی اللہ علیہ وسلم کے اوپر جھک گئیں، کچھ دیر بعد سر اوپر اٹھایا اور آپ رو پڑیں، اس کے بعد دوبارہ آپ، حضور صلی اللہ علیہ وسلم پر جھک گئیں، کچھ دیر بعد سر اوپر اٹھایا اور آپ مسکرا پڑیں، میں نے سوچا: میں تو ان کو سب سے زیادہ عقلمند سمجھتی تھی، لیکن یہ بھی دوسری عورتوں کی طرح نکلی، جب حضور صلی اللہ علیہ وسلم کا انتقال ہو گیا تو (بعد میں) میں نے ان سے پوچھا: میں نے تمہیں دیکھا، تھا تم حضور صلی اللہ علیہ وسلم پر جھکی، پھر تم نے سر اوپر اٹھایا اور رو پڑی، پھر حضور صلی اللہ علیہ وسلم پر جھکی، پھر سر اٹھایا اور مسکرا دی، اس کی وجہ کیا تھی؟ سیدہ کائنات سیدہ فاطمہ رضی اللہ عنہا نے فرمایا: میں نے (حضور صلی اللہ علیہ وسلم کی صحت کی) نذر مانی ہوئی تھی۔ حضور صلی اللہ علیہ وسلم نے مجھے بتایا کہ اس درد میں میری وفات ہو جائے گی، اس لیے میں رو پڑی تھی، پھر حضور صلی اللہ علیہ وسلم نے مجھے بتایا کہ پورے گھر میں سب سے پہلے میں اپنے ابا سے ملوں گی، یہ سن کر میں خوش ہو گئی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو اس اسناد کے ہمراہ نقل نہیں کیا۔ امام بخاری رحمۃ اللہ علیہ اور امام مسلم رحمۃ اللہ علیہ نے شعبی کے ذریعے، مسروق کے واسطے سے ام المومنین سیدہ عائشہ رضی اللہ عنہا کی حدیث روایت کی ہے۔ [المستدرك على الصحيحين/كتاب الأدب/حدیث: 7908]

سیدنا انس بن مالک رضی اللہ عنہ فرماتے ہیں کہ نبی اکرم صلی اللہ علیہ وسلم جب (کوئی خاص) بات کرتے تو ایک ایک کلمہ تین تین مرتبہ دہراتے، تاکہ لوگ اچھی طرح سمجھ لیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الأدب/حدیث: 7909]

ابن العلاء بن الحضرمی اپنے والد کا یہ بیان نقل کرتے ہیں کہ انہوں نے نبی اکرم صلی اللہ علیہ وسلم کی جانب ایک خط لکھا، اس کا آغاز اپنی ذات سے کیا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الأدب/حدیث: 7910]