ابورافع کہتے ہیں: میں رسول اللہ صلی اللہ علیہ وسلم کے لئے بکری کا سینہ بھون رہا تھا۔ حضور صلی اللہ علیہ وسلم اس میں سے تناول فرماتے اور (نیا وضو کئے بغیر) نماز کے لئے چلے جاتے۔ [المستدرك على الصحيحين/كتاب الأطعمة/حدیث: 7278]

سیدنا ابورافع فرماتے ہیں: میں رسول اللہ صلی اللہ علیہ وسلم کے لئے بکری کا سینہ بھونتا، آپ نماز کے لئے وضو کر چکے ہوتے، آپ صلی اللہ علیہ وسلم اس میں سے کھاتے اور (تازہ وضو کئے بغیر) نماز کے لئے تشریف لے جاتے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كتاب الأطعمة/حدیث: 7279]

صفوان بن امیہ فرماتے ہیں: رسول اللہ صلی اللہ علیہ وسلم نے مجھے دیکھا، میں ہاتھ کے ساتھ ہڈی سے گوشت توڑ توڑ کر کھا رہا تھا، حضور صلی اللہ علیہ وسلم نے فرمایا: اے صفوان! میں نے کہا: لبیک یا رسول اللہ صلی اللہ علیہ وسلم ، آپ صلی اللہ علیہ وسلم نے فرمایا: بوٹی اپنے منہ سے توڑ کر کھاؤ۔ کیونکہ اس طرح بوٹی لذیذ لگتی ہے، اور کھانا صحیح فائدہ دیتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأطعمة/حدیث: 7280]

سیدنا ابوہریرہ رضی اللہ عنہ اور سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ارشاد فرمایا: شریطہ مت کھاؤ، کیونکہ یہ شیطان کا ذبیحہ ہے۔ ابن مبارک کہتے ہیں: شریطہ یہ ہے کہ جانور کا حلقوم کاٹے بغیر کسی اور طریقے سے اس کی جان نکل جائے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأطعمة/حدیث: 7281]

سیدنا عبداللہ بن عباس رضی اللہ عنہما فرماتے ہیں: شیاطین اپنے ساتھیوں کو تلقین کرتے ہیں کہ جو چیز اللہ کے نام پر ذبح کی گئی ہو، وہ مت کھاؤ اور جو چیز تم خود مارو، اس کو کھا لیا کرو۔ تب اللہ تعالیٰ نے یہ آیت نازل فرمائی۔ {وَلَا تَأْكُلُوا مِمَّا لَمْ يُذْكَرِ اسْمُ اللَّهِ عَلَيْهِ} [الأنعام: 121] ” وہ جانور نہ کھاؤ، جس پر ذبح کے وقت اللہ کا نام نہ لیا گیا ہو “ [المستدرك على الصحيحين/كتاب الأطعمة/حدیث: 7282]

سیدنا ابوسعید خدری رضی اللہ عنہ فرماتے ہیں کہ ایک آدمی کی اونٹنی مرنے لگی تو اس نے اس کو وتد کے ساتھ ذبح کر دیا۔ میں نے اس سے پوچھا: وہ وتد لوہے کا تھا؟ اس نے کہا: نہیں، لکڑی کا تھا۔ اس نے نبی اکرم صلی اللہ علیہ وسلم سے پوچھا تو حضور صلی اللہ علیہ وسلم نے فرمایا: اس کو کھا لو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور یہ اسناد امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے۔ میں نے اس حدیث کے صحیح ہونے کا حکم نہیں لگایا کیونکہ مالک بن انس نے اس میں موطا میں زید بن اسلم سے ارسال کیا ہے۔ [المستدرك على الصحيحين/كتاب الأطعمة/حدیث: 7283]

سیدنا زید بن ثابت رضی اللہ عنہ فرماتے ہیں: ایک بھیڑئیے نے ایک بکری پر حملہ کر کے اس کو زخمی کر دیا، ان لوگوں نے اس بکری کو مروہ میں ذبح کر دیا، نبی اکرم صلی اللہ علیہ وسلم نے اس کے کھانے کی اجازت عطا فرما دی۔ ٭٭ یہ حدیث صحیح الاسناد ہے، امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأطعمة/حدیث: 7284]

سیدنا جابر رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جنین کا ذبح، اس کی ماں کا ذبح ہے (یعنی ماں کو ذبح کر لیا تو اس کے پیٹ کا بچہ بھی ذبح ہی سمجھا جائے گا۔ جنین پیٹ کے بچے کو کہتے ہیں) ٭٭ اس حدیث کو ابوالزبیر سے روایت کرنے میں ثقہ راویوں میں سے عبیداللہ بن ابی زیاد قداح مکی نے زہیر کی متابعت کی ہے۔ [المستدرك على الصحيحين/كتاب الأطعمة/حدیث: 7285]

عبیداللہ ابن ابی زیاد القداح، ابوالزبیر کے واسطے سے سیدنا جابر بن عبداللہ رضی اللہ عنہما کا بیان نقل کرتے ہیں کہ رسول اللہ صلی اللہ علیہ وسلم نے ارشاد فرمایا: جنین کا ذبح، اس کی ماں کا ذبح ہے۔ ٭٭ حسین بن علی تمیمی بیان کرتے ہیں کہ محمد بن اسحاق نے محمد بن یحیی کے واسطے سے اسحاق بن ابراہیم حنظلی سے روایت کی ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ یہ حدیث ابن ابی لیلی اور حماد بن شعیب کے واسطے سے ابوالزبیر سے معروف ہے۔ [المستدرك على الصحيحين/كتاب الأطعمة/حدیث: 7286]

جبکہ صحیح اسناد کے ساتھ یہ حدیث سیدنا ابوہریرہ رضی اللہ عنہ سے بھی مروی ہے۔ (جیسا کہ درج ذیل ہے) [المستدرك على الصحيحين/كتاب الأطعمة/حدیث: 7287]