سیدنا ابوہریرہ رضی اللہ عنہ فرماتے کہ رسول اللہ صلی اللہ علیہ وسلم نے ارشاد فرمایا: جنین کا ذبح، اس کی ماں کا ذبح ہے۔ [المستدرك على الصحيحين/كتاب الأطعمة/حدیث: 7288]

سیدنا عبداللہ بن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: جنین کا ذبح، اس کی ماں کا ذبح ہے , لیکن بہتر ہے کہ اس کو بھی ذبح کر دیا جائے , تاکہ اس کے جسم میں جو خون ہے وہ بھی نکل جائے۔ ٭٭ یہ بہت عظیم باب ہے، اس کا مدار عطیہ کے ابوسعید کے طرق پر ہے۔ شیخین رحمۃ اللہ علیہما نے اس کو نقل نہیں کیا۔ بعض لوگوں کو یہ وہم ہے کہ ابوایوب کی حدیث صحیح ہے لیکن حقیقت میں ایسا نہیں ہے۔ [المستدرك على الصحيحين/كتاب الأطعمة/حدیث: 7289]

سیدنا ابوایوب رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جنین کا ذبح، اس کی ماں کا ذبح ہے۔ ٭٭ ابووداک کی ابوسعید سے روایت کردہ حدیث میں ” علان “ منفرد ہیں۔ اس کی اسناد میں ” زیاد “ ہیں، روایت حدیث میں ان سے اکثر غلطی سرزد ہوتی ہے۔ ان کی روایت کو دلیل کے طور پر پیش نہیں کیا جا سکتا۔ اصول حدیث کا ماہر جب اس باب میں غور و فکر کرے گا تو وہ حیرانگی کے عالم میں یہی کہے گا کہ امام بخاری رحمۃ اللہ علیہ اور امام مسلم رحمۃ اللہ علیہ نے اس حدیث کو نقل نہیں کیا۔ [المستدرك على الصحيحين/كتاب الأطعمة/حدیث: 7290]

سیدنا عبداللہ بن عباس رضی اللہ عنہما فرماتے ہیں: زمانہ جاہلیت میں لوگ کئی چیزیں کھا لیتے تھے اور کئی چیزیں (بلاوجہ صرف) نفرت کی بناء پر چھوڑ دیتے تھے، اللہ تعالیٰ نے اپنے نبی صلی اللہ علیہ وسلم کو بھیجا، اپنی کتاب نازل فرمائی، اس میں کچھ چیزوں کو حلال کیا اور کچھ کو حرام، چنانچہ جس چیز کو کتاب اللہ نے حلال قرار دیا، وہ حلال ہے، اور جن چیزوں کو حرام قرار دیا، وہ حرام ہیں۔ اور جن کے بارے میں خاموشی ہے وہ معاف ہیں۔ اس کے بعد یہ آیت نازل فرمائی: {قُلْ لَا أَجِدُ فِي مَا أُوحِيَ إِلَيَّ مُحَرَّمًا عَلَى طَاعِمٍ} [الأنعام: 145] ” تم فرماؤ میں نہیں پاتا اس میں جو میری طرف وحی ہوئی کسی کھانے والے پر کوئی کھانا حرام “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأطعمة/حدیث: 7291]

سیدنا ابوثعلبہ خشنی رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا: بے شک اللہ تعالیٰ نے کچھ حدود مقرر کی ہیں، ان سے آگے مت بڑھو، اور کچھ چیزیں تم پر فرض کی ہیں، ان کو ضائع مت کرو، کچھ چیزوں کو حرام کیا ہے، ان کی حرمت سے مت کھیلو، اور کچھ چیزوں کو وضاحت کئے بغیر چھوڑ دیا ہے، یہ اللہ تعالیٰ نے بھول کر نہیں کیا بلکہ اپنی رحمت سے ایسا کیا ہے، اس لئے ان چیزوں کو قبول کر لیا کرو، ان کے بارے میں بحث مت کیا کرو۔ [المستدرك على الصحيحين/كتاب الأطعمة/حدیث: 7292]

سیدنا سلمان رضی اللہ عنہ فرماتے ہیں کہ رسول اللہ صلی اللہ علیہ وسلم سے گھی، پنیر اور فراء (وہ پوستین جس کا اندرونی حصہ لومڑی، بلی وغیرہ جانوروں کی کھال سے تیار کیا جاتا ہے) کے بارے میں پوچھا گیا، آپ صلی اللہ علیہ وسلم نے فرمایا: حلال وہ چیز ہے جس کو اللہ تعالیٰ نے اپنی کتاب میں حلال قرار دیا ہے، اور حرام وہ چیز ہے جس کو اللہ تعالیٰ نے اپنی کتاب میں حرام قرار دے دیا ہے۔ اور جس چیز کے بارے میں خاموشی ہے، وہ معاف ہے۔ (چاہو تو استعمال کر لو اور چاہو تو نہ کرو)۔ ٭٭ یہ حدیث صحیح ہے اور اس باب میں مفسر ہے۔ سیف بن ہارون کی روایت امام بخاری رحمۃ اللہ علیہ اور امام مسلم رحمۃ اللہ علیہ نے نقل نہیں کی۔ [المستدرك على الصحيحين/كتاب الأطعمة/حدیث: 7293]

سیدنا انس رضی اللہ عنہ فرماتے ہیں: نبی اکرم صلی اللہ علیہ وسلم ثفل کو پسند کرتے تھے۔ محمد بن اسحاق کہتے ہیں: ثفل ” ثرید “ کو کہتے ہیں۔ [المستدرك على الصحيحين/كتاب الأطعمة/حدیث: 7294]

سیدنا عبداللہ بن عباس رضی اللہ عنہما فرماتے ہیں: رسول اللہ صلی اللہ علیہ وسلم کو کھانوں میں سب سے زیادہ ” ثرید “ پسند تھا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اس حدیث کے راوی عمر بن سعید، سفیان اور مبارک کے بھائی ہیں، اور یہ دونوں بھی سعید کے بیٹے ہیں۔ حضور صلی اللہ علیہ وسلم کا یہ ارشاد ” عائشہ کی فضیلت دیگر عورتوں پر ایسے ہی ہے جیسے ثرید کی فضیلت دوسرے کھانوں پر “ بخاری اور مسلم میں موجود ہے۔ [المستدرك على الصحيحين/كتاب الأطعمة/حدیث: 7295]

عطاء بن السائب فرماتے ہیں: ہمیں ایک دعوت پر بلایا گیا، وہاں پر سعید بن جبیر تھے، مقسم تھے، فلاں، فلاں بھی تھے۔ جب کھانے کا تھال سامنے رکھا تو سعید بن جبیر نے ان سے کہا: کیا تم سب نے سنا ہے کہ کھاتے وقت کیا پڑھتے ہیں؟ مقسم نے کہا: آپ ان کو بتا دیجئے، انہوں نے کہا: سیدنا عبداللہ بن عباس رضی اللہ عنہما بیان کرتے ہیں کہ رسول اللہ صلی اللہ علیہ وسلم نے ارشاد فرمایا: برکت کھانے کے درمیان نازل ہوتی ہے، اس لئے کھانے کے اطراف سے کھاؤ، درمیان سے مت کھاؤ۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأطعمة/حدیث: 7296]

سیدنا واثلہ بن اسقع اہل صفاء میں سے ہیں: آپ فرماتے ہیں: ہم پر تین دن بہت سخت گزرے، (اس وقت یہ سلسلہ عام تھا کہ) جو صحابی نماز پڑھ کر مسجد سے نکلتا، وہ اپنی حیثیت کے مطابق ایک، یا دو یا تین (یا زیادہ) کا ہاتھ پکڑ کر اپنے ساتھ لے جاتا اور کھانا کھلا دیتا۔ آپ فرماتے ہیں: میں ان لوگوں میں سے ہوں کہ تین دن کوئی بھی میرا ہاتھ پکڑ کر ساتھ نہیں لے کر گیا۔ میں نے عشاء کی نماز میں سیدنا ابوبکر صدیق رضی اللہ عنہ کو دیکھا، میں ان کے پاس آ گیا، میں یہ چاہتا تھا کہ آپ مجھے کھانے کی پیشکش کر دیں (اسی بہانے سے) میں نے ان کو سورت سبا سکھانے کو کہا، آپ نے سورۃ سبا سنانا شروع کی اور سناتے سناتے اپنے گھر تک پہنچ گئے، گھر کے دروازے پر رک کر انہوں نے سورت پوری کی اور اندر تشریف لے گئے اور مجھے اسی طرح چھوڑ دیا، میں پھر سیدنا عمر کے پیچھے لگ گیا، انہوں نے بھی سیدنا ابوبکر کی طرح ہی کیا۔ (رات بھوکے ہی گزاری) صبح کے وقت میں رسول اللہ صلی اللہ علیہ وسلم کی خدمت میں حاضر ہوا اور رات کا ماجرا سنایا، حضور صلی اللہ علیہ وسلم نے لونڈی سے پوچھا: کچھ کھانے کے لئے ہے؟ اس نے کہا: جی ہاں۔ روٹی اور ایک پیالہ گھی ہے۔ حضور صلی اللہ علیہ وسلم نے وہ منگوائی، پھر اپنے ہاتھ سے روٹی کا چورا کیا، اور گھی کا پیالہ لے کر اس میں روٹی کو خوب مل دیا پھر اپنے ہاتھ سے اس کو جمع کیا، اور اس کو ثرید بنا دیا۔ پھر فرمایا: جاؤ، اپنے سمیت دس صحابہ کو بلا بلاؤ، میں نے اپنے سمیت دس آدمیوں کو بلایا، حضور صلی اللہ علیہ وسلم نے فرمایا: بیٹھ جاؤ، میں نے وہ تھال رکھ دیا، حضور صلی اللہ علیہ وسلم نے فرمایا: بسم اللہ پڑھ کر اس کے کناروں سے کھاؤ، اوپر سے نہیں کھانا کیونکہ برکت اوپر سے نازل ہوتی ہے۔ پھر راوی نے بتایا کہ اس کے بعد پھر حضور صلی اللہ علیہ وسلم نے دو مرتبہ دس دس آدمیوں کو بلایا، (سب نے پیٹ بھر کر کھایا اس کے باوجود) کافی سارا کھانا بچ گیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأطعمة/حدیث: 7297]