سیدنا عبداللہ بن عباس رضی اللہ عنہما سے اللہ تعالیٰ کے اس فرمان ﴿اللَّهُ الَّذِي خَلَقَ سَبْعَ سَمَاوَاتٍ وَمِنَ الْأَرْضِ مِثْلَهُنَّ﴾ [الطلاق: 12] کے متعلق روایت ہے، انہوں نے فرمایا: ”(اس سے مراد) سات زمینیں ہیں، ہر زمین میں تمہارے نبی جیسا ایک نبی، آدم جیسا آدم، نوح جیسا نوح، ابراہیم جیسا ابراہیم اور عیسیٰ جیسا عیسیٰ (علیہم السلام) موجود ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب التفسير/حدیث: 3864]

سیدنا عبداللہ بن عباس رضی اللہ عنہما سے اللہ عزوجل کے اس فرمان ﴿خَلَقَ سَبْعَ سَمَاوَاتٍ وَمِنَ الْأَرْضِ مِثْلَهُنَّ﴾ کے متعلق روایت ہے، انہوں نے فرمایا: ”ہر زمین میں ابراہیم علیہ السلام کی مانند (ایک ہستی) موجود ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب التفسير/حدیث: 3865]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم کی ایک لونڈی تھی جس سے آپ صلی اللہ علیہ وسلم کے ازواجی تعلقات تھے، سیدہ حفصہ رضی اللہ عنہا آپ صلی اللہ علیہ وسلم سے (اصرار کے ساتھ) گفتگو کرتی رہیں یہاں تک کہ آپ صلی اللہ علیہ وسلم نے اس لونڈی کو اپنے اوپر حرام کر لیا، تب اللہ تعالیٰ نے یہ آیت نازل فرمائی: ﴿يَاأَيُّهَا النَّبِيُّ لِمَ تُحَرِّمُ مَا أَحَلَّ اللَّهُ لَكَ تَبْتَغِي مَرْضَاتَ أَزْوَاجِكَ﴾ [التحريم: 1]
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب التفسير/حدیث: 3866]

سیدنا عبداللہ بن عباس رضی اللہ عنہما سے روایت ہے کہ ان کے پاس ایک شخص آیا اور کہنے لگا: میں نے اپنی بیوی کو اپنے اوپر حرام کر لیا ہے، تو انہوں نے فرمایا: ”تم نے غلط کہا، وہ تم پر حرام نہیں ہوئی،“ پھر انہوں نے یہ آیت تلاوت فرمائی: ﴿يَاأَيُّهَا النَّبِيُّ لِمَ تُحَرِّمُ مَا أَحَلَّ اللَّهُ لَكَ﴾
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب التفسير/حدیث: 3867]

سیدنا علی بن ابی طالب رضی اللہ عنہ سے اللہ عزوجل کے اس فرمان ﴿قُوا أَنْفُسَكُمْ وَأَهْلِيكُمْ نَارًا﴾ [التحريم: 6] کے متعلق روایت ہے، انہوں نے فرمایا: ”(اس کا مطلب یہ ہے کہ) تم اپنے آپ کو اور اپنے گھر والوں کو خیر و بھلائی کی تعلیم دو۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب التفسير/حدیث: 3868]

سیدنا عبداللہ بن مسعود رضی اللہ عنہ سے اللہ تعالیٰ کے اس فرمان ﴿وَقُودُهَا النَّاسُ وَالْحِجَارَةُ﴾ [سورة البقرة: 24] کے متعلق روایت ہے، انہوں نے فرمایا: ”(جہنم کے) وہ پتھر گندھک (کبریت) کے ہیں، جنہیں اللہ نے اپنے پاس جس طرح چاہا ویسے ہی پیدا فرمایا ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب التفسير/حدیث: 3869]

سیدنا سہل بن سعد رضی اللہ عنہ سے مروی ہے کہ انصار کا ایک نوجوان (اپنے دل میں) دوزخ کا شدید خوف رکھتا تھا، جب بھی جہنم کا تذکرہ ہوتا تو وہ اس قدر روتا کہ اسی وجہ سے وہ گھر میں محصور ہو کر رہ گیا، جب نبی کریم صلی اللہ علیہ وسلم کے سامنے اس بات کا تذکرہ ہوا تو آپ صلی اللہ علیہ وسلم اس کے گھر تشریف لے گئے، جب آپ صلی اللہ علیہ وسلم اس کے پاس داخل ہوئے تو وہ نوجوان آپ صلی اللہ علیہ وسلم سے لپٹ گیا اور (اسی عالم میں) ڈھیر ہو کر وفات پا گیا، تو نبی کریم صلی اللہ علیہ وسلم نے فرمایا: ”اپنے ساتھی کی تجہیز و تکفین کرو، کیونکہ خوف نے اس کا کلیجہ پاش پاش کر دیا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب التفسير/حدیث: 3870]

منصور بن عمار رحمہ اللہ سے روایت ہے کہ انہوں نے کہا: میں نے ایک مرتبہ حج کیا اور کوفہ کی ایک گلی میں قیام کیا، ایک اندھیری رات میں باہر نکلا تو آدھی رات کے وقت ایک پکارنے والے کی آواز سنی جو پکار پکار کر کہہ رہا تھا: «إِلَهِي، وَعِزَّتِكَ وَجَلَالِكَ مَا أَرَدْتُ بِمَعْصِيَتِي إِيَّاكَ مُخَالَفَتَكَ، وَلَقَدْ عَصَيْتُكَ إِذْ عَصَيْتُكَ وَمَا أَنَا بِذَلِكَ جَاهِلٌ، وَلَكِنْ خَطِيئَةٌ عَرَضَتْ أَعَانَنِي عَلَيْهَا شَقَائِي، وَغَرَّنِي سِتْرُكَ الْمَرْخِيُّ عَلَيَّ، وَقَدْ عَصَيْتُكَ بِجَهْلِي، وَخَالَفْتُكَ بِجهْلِي، فَالْآنَ مِنْ عَذَابِكَ مَنْ يَسْتَنْقِذُنِي، وَبِحَبْلِ مَنْ أَتَّصِلُ إِنْ أَنْتَ قَطَعْتَ حَبْلَكَ عَنِّي، وَاشَبَابَاهُ وَاشَبَابَاهْ» ”اے میرے معبود! تیری عزت اور تیرے جلال کی قسم، میں نے تیری نافرمانی کر کے تیری مخالفت کا ارادہ نہیں کیا تھا، جب میں نے تیری نافرمانی کی تو اس وقت میں تیرے مقام سے جاہل نہیں تھا بلکہ ایک خطا سامنے آگئی جس پر میری بدبختی نے میری مدد کی اور تیرے لٹکے ہوئے پردے نے مجھے دھوکے میں رکھا، میں نے اپنی جہالت کی وجہ سے تیری نافرمانی اور تیری مخالفت کی، پس اب تیرے عذاب سے مجھے کون چھڑائے گا؟ اور اگر تو نے اپنی رسی مجھ سے کاٹ دی تو میں کس کی رسی تھاموں گا؟ ہائے میری جوانی! ہائے میری جوانی!“ منصور کہتے ہیں کہ جب وہ اپنی بات سے فارغ ہوا تو میں نے اللہ کی کتاب کی یہ آیت تلاوت کی: ﴿نَارًا وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلَاظٌ شِدَادٌ﴾ [سورة التحريم: 6] میں نے ایک زوردار حرکت سنی اور اس کے بعد کوئی آہٹ سنائی نہ دی تو میں آگے چل دیا، جب اگلا دن ہوا تو میں اسی راستے سے واپس گزرا تو دیکھا کہ ایک جنازہ رکھا ہوا ہے اور وہاں ایک بوڑھی عورت موجود ہے، میں نے اس سے میت کے بارے میں پوچھا تو وہ مجھے پہچان نہ سکی اور کہنے لگی: ”یہاں سے ایک آدمی گزرا تھا اللہ اسے اس کے (اعمال) کا بدلہ دے، وہ کل رات میرے بیٹے کے پاس سے گزرا جبکہ میرا بیٹا کھڑا نماز پڑھ رہا تھا، اس نے اللہ کی کتاب کی ایک آیت تلاوت کی، جب میرے بیٹے نے وہ آیت سنی تو اس کا پتہ پانی ہو گیا اور وہ وہیں فوت ہو گیا۔“ [المستدرك على الصحيحين/كتاب التفسير/حدیث: 3871]

سیدنا عمر بن خطاب رضی اللہ عنہ سے اللہ تعالیٰ کے اس فرمان ﴿تُوبُوا إِلَى اللَّهِ تَوْبَةً نَصُوحًا﴾ [التحريم: 8] کے متعلق روایت ہے، انہوں نے فرمایا: ”(توبہ نصوح یہ ہے کہ) بندہ گناہ کرے پھر توبہ کرے اور دوبارہ اس گناہ کی طرف نہ لوٹے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب التفسير/حدیث: 3872]

سیدنا عبداللہ بن مسعود رضی اللہ عنہ نے فرمایا: ”توبہ نصوح ہر گناہ کو مٹا دیتی ہے، اور یہ بات قرآن میں موجود ہے،“ پھر انہوں نے یہ آیت تلاوت فرمائی: ﴿يَاأَيُّهَا الَّذِينَ آمَنُوا تُوبُوا إِلَى اللَّهِ تَوْبَةً نَصُوحًا عَسَى رَبُّكُمْ أَنْ يُكَفِّرَ عَنْكُمْ سَيِّئَاتِكُمْ﴾ [التحريم: 8]
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب التفسير/حدیث: 3873]