الحمدللہ! انگلش میں کتب الستہ سرچ کی سہولت کے ساتھ پیش کر دی گئی ہے۔
| احادیث 1 سے 200 7. النَّدَمُ تَوْبَةٌ ندامت توبہ ہے
13-عبد الله بن معقل کہتے ہیں کہ میں اپنے والد کے ہمراہ عبداللہ بن مسعود رضی اللہ عنہ کی خدمت میں حاضر ہوا تو انہوں نے ان کو کہا: بے شک میں نے رسول اللہ صلی اللہ علیہ وسلم کو یہ فرماتے سنا: ”ندامت توبہ ہے۔“
تخریج الحدیث: «صحيح، أخرجه ابن ماجه: 4252، أحمد: 1/376، الحميدي: 105»
14-عبدالله بن معقل کہتے ہیں کہ میرے والد نے عبداللہ بن مسعود رضی اللہ عنہ سے پوچھا: کیا آپ نے رسول اللہ صلی اللہ علیہ وسلم کو یہ فرماتے سنا ہے کہ ندامت توبہ ہے؟ انہوں نے کہا: ہاں۔
تخریج الحدیث: «صحيح، أخرجه ابن ماجه: 4252، أحمد: 1/376، الحميدي: 105»
وضاحت:
تشریح - انسان سے گناہ اور غلطی کا صدور کوئی اچنبھے کی بات نہیں۔ تاہم اس پر ڈٹ جانا اور توبہ و استغفار نہ کرنا یقیناً خطرناک عمل ہے۔ خوش قسمت وہی ہے جو گناہ کے بعد توبہ کر لے۔ علماء کرام فرماتے ہیں کہ توبہ ہر گناہ سے واجب ہے اگر اس گناہ کا تعلق اللہ تعالیٰ سے ہے، کسی آدمی کا حق اس سے متعلق نہیں تو ایسے گناہ سے توبہ کی قبولیت کے لیے تین شرطیں ہیں: ➊ اس گناہ کو چھوڑ دے جس سے وہ توبہ کر رہا ہے۔ ➋ اس پر ندامت و شرمندگی کا اظہار کرے۔ ➌ پختہ ارادہ کرے کہ آئندہ کبھی یہ گناہ نہیں کروں گا۔ اگر ان تین شرطوں میں سے کوئی بھی شرط مفقود ہوگی تو توبہ صحیح نہیں ہوگی اور اگر گناہ کا تعلق کسی انسان سے ہے تو اس کے لیے چار شرطیں ہیں، تین وہی جو ابھی مذکور ہوئی اور چوتھی یہ ہے کہ: ➍ وہ صاحب حق کا حق ادا کرے یا صاحب حق اسے معاف کر دے۔ مذکورہ حدیث میں توبہ کی دوسری شرط ندامت و شرمندگی کی اہمیت بیان ہوئی ہے کہ گناہ پر ندامت کا اظہار بھی ایک قسم کی توبہ ہی ہے۔ تاہم اس کا یہ مطلب نہیں کہ بندہ صرف ندامت ہی کو کافی سمجھے اور باقی باتوں سے غفلت برتے، ایسا نہیں۔ بلکہ خالص توبہ کے لیے اوپر بیان کر دو شرطوں کا خیال رکھنا ضروری ہے۔ واللہ اعلم |