الحمدللہ! انگلش میں کتب الستہ سرچ کی سہولت کے ساتھ پیش کر دی گئی ہے۔
| احادیث 1 سے 200 113. الْإِيمَانُ يَمَانٍ، وَالْحِكْمَةُ يَمَانِيَةٌ ایمان اہل یمن کا ہے اور حکمت بھی اہل یمن کی ہے
سیدنا ابوہریرہ رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: تمہارے پاس اہل یمن آئے ہیں، وہ بڑے رقیق القلب ہیں، ایمان اہل یمن کا ہے، فقہ اہل یمن کی ہے اور حکمت بھی اہل یمن کی ہے۔“
تخریج الحدیث: «إسناده صحيح، وأخرجه البخاري 4388، و مسلم 52»
سیدنا ابوہریرہ رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”ایمان اہل یمن کا ہے، فقہ اہل یمن کی ہے اور حکمت بھی اہل یمن کی ہے۔“
تخریج الحدیث: «إسناده صحيح، وأخرجه البخاري 4388، و مسلم 52»
سیدنا ابوہریرہ رضی اللہ عنہ نبی صلی اللہ علیہ وسلم سے روایت کرتے ہیں کہ آپ نے فرمایا: ”تمہارے پاس اہل یمن آئے ہیں۔۔۔ مکمل حدیث بیان کی اور اس میں یہ بھی تھا: ”ایمان اہل یمن کا ہے اور حکمت بھی اہل یمن کی ہے۔“ یہ حدیث مختصر ہے۔
تخریج الحدیث: «إسناده صحيح، وأخرجه البخاري 4388، و مسلم 52»
سیدنا عقبہ بن عمرو رضی اللہ عنہ کہتے ہیں کہ رسول اللہ صلی اللہ علیہ وسلم نے اپنے ہاتھ سے یمن کی طرف اشارہ کیا اور فرمایا: ”ایمان اس طرف ہے۔“ یہ روایت مختصر ہے۔
تخریج الحدیث: «إسناده صحيح، أخرجه البخاري 3302، و أحمد: 118/4»
وضاحت:
تشریح: ان احادیث میں یمن اور اہل یمن کی فضیلت بیان ہوئی ہے۔ یہ لوگ بغیر کسی جنگ کے اور بغیر تکلیف کے محض رغبت اور خوشی سے دائرۂ اسلام میں آئے تھے۔ نبی کریم صلی اللہ علیہ وسلم صلی اللہ علیہ وسلم نے ان کی تعریف فرمائی اور فرمایا کہ ایمان تو اہل یمن کا ہے، فقاہت تو اہل یمن کی ہے اور حکمت بھی اہل یمن کی ہے۔ اہل یمن سے مراد وہاں کے صحیح العقیدہ مسلمان ہیں خواہ وہ نبی کریم صلی اللہ علیہ وسلم صلی اللہ علیہ وسلم کے دور کے ہوں یا بعد والے کسی بھی دور کے ہوں، وہ سب اس فضیلت کے مستحق ہیں، آپ صلی اللہ علیہ وسلم نے یمن اور اہل یمن کی اور بھی فضیلتیں بیان فرمائی ہیں۔ ملاحظہ فرمائیں: ① ایل یمین نرم دل، رقیق القلب ہیں۔ (بخاری: 4390) ② آپ صلی اللہ علیہ وسلم نے دعا فرمائی: ”اے اللہ! ہمارے شام میں برکت فرما، اے اللہ! ہمارے یمن میں برکت فرما۔“ (بخاری: 7095) ③ آپ صلی اللہ علیہ وسلم نے یمن کی طرف دیکھ کر فرمایا: ”اے اللہ! ان کے دلوں کو (ہماری طرف) متوجہ فرما۔“ (ترمذی: 3934 حسن) ④ -جب آیت ﴿فَسَوْفَ يَأْتِي اللَّهُ بِقَوْمٍ يُحِبُّهُمْ وَيُحِبُّونَهُ﴾ (المآئدة: 54) ”پس عنقریب اللہ ایک ایسی قوم کو لے آئے گا کہ وہ ان سے محبت کرے گا اور وہ اس سے محبت کریں گے۔“ نازل ہوئی تو آپ صلی اللہ علیہ وسلم نے سیدنا ابوموسٰی رضی اللہ عنہ سے فرمایا: ”یہ تیری قوم یمن والے (مراد) ہیں۔“ [حاكم: 312/2 دلائل النبوة للبيهقي: 2084،صحيح] ⑤ ایک مرتبہ نبی صلی اللہ علیہ وسلم نے فرمایا: ”تمہارے پاس بادلوں کے ٹکڑوں کی طرح اہل یمن آرہے ہیں وہ زمین میں سب سے بہتر لوگ ہیں۔“ ایک انصاری صحابی نے آپ صلی اللہ علیہ وسلم سے پوچھا: کیا وہ ہم سے بھی بہتر ہیں؟ آپ صلی اللہ علیہ وسلم خاموش رہے، اس نے پھر کہا: کیا ہم سے بھی بہتر ہیں اے اللہ کے رسول؟ آپ صلی اللہ علیہ وسلم خاموش رہے۔ اس نے سہ بار عرض کیا تو آپ صلی اللہ علیہ وسلم نے آہستہ سے فرمایا: ”سوائے تمہارے۔“ [أحمد: 84/4،حسن] |