ابن عباس رضی اللہ عنہما سے روایت ہے کہ انہوں نے ایک رات رسول اللہ صلی اللہ علیہ وسلم کی زوجہ مطہرہ اور اپنی خالہ میمونہ رضی اللہ عنہا کے گھر گزاری، انہوں نے فرمایا: میں تکیے کے عرض میں لیٹ گیا اور رسول اللہ صلی اللہ علیہ وسلم اور آپ کی اہلیہ اس کے طول میں لیٹ گئے، رسول اللہ صلی اللہ علیہ وسلم سو گئے حتیٰ کہ جب آدھی رات کا وقت ہوا یا اس سے تھوڑی دیر پہلے یا تھوڑی دیر بعد آپ بیدار ہوئے اور اپنے ہاتھوں سے چہرے سے نیند کو دور کرنے لگے، پھر آپ نے سورہ آل عمران کی آخری دس آیتیں پڑھیں، پھر آپ ایک (کھونٹی پر) لٹکی ہوئی مشک کی طرف گئے اور اس سے خوب اچھی طرح وضو کیا، پھر کھڑے ہو کر نماز پڑھنے لگے۔ ابن عباس رضی اللہ عنہما کہتے ہیں: میں بھی اٹھ کھڑا ہوا اور اسی طرح کیا جس طرح نبی صلی اللہ علیہ وسلم نے کیا تھا، پھر میں آپ کے (بائیں) پہلو میں کھڑا ہو گیا، رسول اللہ صلی اللہ علیہ وسلم نے اپنا داہنا ہاتھ میرے سر پر رکھا اور میرا دایاں کان پکڑ کر اسے مروڑنے لگے، آپ نے دو رکعتیں پڑھیں، اس کے بعد پھر دو رکعتیں پڑھیں، اس کے بعد پھر دو رکعتیں پڑھیں، اس کے بعد پھر دو رکعتیں پڑھیں، اس کے بعد پھر دو رکعتیں پڑھیں، پھر آپ نے وتر پڑھا اور لیٹ گئے، حتیٰ کہ مؤذن آیا تو آپ نے اٹھ کر دو ہلکی سی رکعتیں پڑھیں، پھر باہر تشریف لا کر صبح کی نماز پڑھائی۔ [المستدرك على الصحيحين/كتاب: الجهاد/حدیث: 2484]

عائشہ رضی اللہ عنہا سے روایت ہے کہ نبی صلی اللہ علیہ وسلم رات کو گیارہ رکعات نماز پڑھتے تھے، ان میں ایک رکعت وتر ہوتا تھا۔ [المستدرك على الصحيحين/كتاب: الجهاد/حدیث: 2485]

عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”رات کی نماز دو دو رکعت ہے، پھر جب کوئی صبح ہو جانے سے ڈرے تو ایک رکعت پڑھ لے، وہ اس کی ساری نماز کو طاق بنا دے گی۔“ [المستدرك على الصحيحين/كتاب: الجهاد/حدیث: 2486]

عبداللہ بن عمر رضی اللہ عنہما سے روایت ہے کہ ایک آدمی نے رسول اللہ صلی اللہ علیہ وسلم سے رات کی نماز سے متعلق دریافت کیا تو رسول اللہ صلی اللہ علیہ وسلم نے فرمایا: ”رات کی نماز دو دو رکعت ہے، پھر جب کوئی تم میں سے صبح صادق ہو جانے سے ڈرے تو ایک رکعت پڑھ لے، وہ اس کی ساری نماز کو طاق بنا دے گی۔“ [المستدرك على الصحيحين/كتاب: الجهاد/حدیث: 2487]

ایک دوسری سند سے ابن عمر رضی اللہ عنہما سے اسی طرح مروی ہے۔ [المستدرك على الصحيحين/كتاب: الجهاد/حدیث: 2488]

عبد اللہ بن عمر رضی اللہ عنہما سے روایت ہے، وہ بیان فرماتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا: ”رات کی نماز دو دو رکعت ہے۔ پھر جب کوئی صبح صادق ہو جانے سے ڈرے تو ایک رکعت وتر پڑھ لے۔“ [المستدرك على الصحيحين/كتاب: الجهاد/حدیث: 2489]

ایک دوسری سند سے ابن عمر رضی اللہ عنہما کے واسطے سے وہ نبی صلی اللہ علیہ وسلم سے اسی طرح مروی ہے۔ [المستدرك على الصحيحين/كتاب: الجهاد/حدیث: 2490]

عائشہ رضی اللہ عنہا سے روایت ہے، وہ بیان فرماتی ہیں کہ رسول اللہ صلی اللہ علیہ وسلم نے رات کے ہر حصہ میں وتر پڑھے اور آخری عمر میں آپ کے وتر (عموماً) سحر کے وقت ختم ہوتے تھے۔ [المستدرك على الصحيحين/كتاب: الجهاد/حدیث: 2491]

عائشہ رضی اللہ عنہا سے روایت ہے کہ نبی صلی اللہ علیہ وسلم ”پانچ رکعات وتر پڑھتے، ان رکعات میں صرف آخری رکعت میں تشہد کے لیے بیٹھتے اور پھر سلام پھیر دیتے۔“ [المستدرك على الصحيحين/كتاب: الجهاد/حدیث: 2492]

ابن شہاب سے روایت ہے کہ سعد بن ابی وقاص رضی اللہ عنہ ایک رکعت وتر پڑھا کرتے تھے۔ [المستدرك على الصحيحين/كتاب: الجهاد/حدیث: 2493]