الحمدللہ! انگلش میں کتب الستہ سرچ کی سہولت کے ساتھ پیش کر دی گئی ہے۔
| احادیث1201 سے 1400 800. أَفْضَلُ الْجِهَادِ كَلِمَةُ حَقٍّ عِنْدَ أَمِيرٍ جَائِرٍ افضل جہاد ظالم امیر کے سامنے کلمہ حق کہنا ہے
سیدنا ابوسعید رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”افضل جہاد ظالم امیر کے سامنے کلمہ حق کہنا ہے۔“
تخریج الحدیث: «إسناده ضعيف، وأخرجه أبو داود: 4344، والترمذي: 2174، وابن ماجه: 4011، وابن خزيمة فى «صحيحه» برقم: 1699، وابن حبان فى «صحيحه» برقم: 275»
عطیہ عوفی ضعیف و مدلس راوی ہے۔ 
سیدنا ابوسعید رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”افضل جہاد ظالم حاکم یا ظالم امیر کے سامنے کلمہ حق و انصاف کہنا ہے۔“
تخریج الحدیث: «إسناده ضعيف، وأخرجه أبو داود: 4344، والترمذي: 2174، وابن ماجه: 4011، وابن خزيمة فى «صحيحه» برقم: 1699، وابن حبان فى «صحيحه» برقم: 275»
عطیہ عوفی ضعیف و مدلس راوی ہے۔
سیدنا ابوامامہ رضی اللہ عنہ سے مروی ہے کہ ایک آدمی جمرہ اولیٰ کے پاس کہنے لگا: اللہ کے رسول! کون سا جہاد افضل ہے؟ رسول الله صلی اللہ علیہ وسلم نے اس سے منہ پھیر لیا پھر آپ نے پوچھا: ”وہ سائل کہاں ہے؟“ راوی کہتا ہے کہ اس آدمی نے کہا: اللہ کے رسول! میں یہاں ہوں۔ تب آپ صلی اللہ علیہ وسلم نے فرمایا: ”افضل جہاد اس شخص کا ہے جس نے کسی ظالم حاکم کے سامنے کلمہ حق کہا:۔“
تخریج الحدیث: «إسناده حسن، وأخرجه ابن ماجه فى «سننه» برقم: 4012، والطبراني فى «الكبير» برقم: 8080، 8081، والطبراني فى «الأوسط» برقم: 1596، 6824، والطبراني فى «الصغير» برقم: 151، وأحمد فى «مسنده» برقم: 22588، والبيهقي فى «سننه الكبير» برقم: 20242»
وضاحت:
تشریح: - ان احادیث میں ظالم اور جابر حکمرانوں کے سامنے حق و انصاف کی بات کہنے کو افضل جہاد قرار دیا گیا ہے کیونکہ جو شخص میدان جہاد وقتال میں کسی دشمن سے جہاد کرتا ہے وہ خوف اور امید دونوں کے درمیان ہوتا ہے اگر اس کو یہ خوف ہوتا ہے کہ دشمن مجھ پر غالب آ جائے یا میں شہید ہو جاؤں گا تو اس کے ساتھ ہی اسے یہ امید بھی ہوتی ہے کہ میں دشمن کو مغلوب کر کے اپنی جان بچالوں گا اس کے بر خلاف جو شخص ظالم حاکم کے سامنے کلمہ حق کہتا ہے اس کے لیے امید کی ملکی سی کرن بھی نہیں ہوتی بلکہ خوف ہی خوف ہوتا ہے، وہ اس حکمران کے مکمل اختیار و قبضہ میں ہونے کی وجہ سے اس یقین کے ساتھ، امر بالمعروف اور نہی عن المنکر کا فریضہ ادا کرتا ہے کہ اس کا انجام دنیا میں میری تباہی و نقصان کے سوا اور کچھ نہیں۔ اور یہ ظاہر ہے کہ جس مہم میں انسان کو اپنی زندگی اور مال و متاع کے باقی رہنے کی کوئی امید نہ ہو اس کو انجام دینا اس مہم کو انجام دینے سے کہیں زیادہ صبر آزما اور بدرجہا افضل ہوگا جس کی انجام دہی میں اسے اپنی زندگی اور مال و متاع کے باقی رہنے کی بہت حد تک امید ہو، اس لیے آپ صلی اللہ علیہ وسلم نے ظالم حاکم کے سامنے کلمہ حق کہنے کو افضل جہاد فرمایا ہے۔ |